अपहरणकर्त्यांचे नाव समोर येताच चंद्रपूर पोलिसांना धक्का.
अपहरणकर्त्याची एका महिन्यापासून पोलिस स्टेशन मध्ये बेपत्ता अशी नोंद.
Bhairav Diwase. Oct 23, 2020
चंद्रपूर:- शहरातील भिवापूर परिसरातून दोन दिवसांपूर्वी पाच आणि सहा वर्षांच्या सख्या बहिणीचे अपहरण झाले. सकाळी नऊ वाजताच्या सुमाराला घडलेल्या या घटनेने चंद्रपुरातील अख्खी पोलिस यंत्रणा हादरली. जिल्हा पोलिस अधीक्षकांनी स्वतः सूत्र हाती घेतली आणि या अपहरण प्रकरणाचा ४८ तासांच्या आता छडा लावला. मात्र, अपहरणाची घटना जेवढी धक्कादायक तेवढीच या मुलींच्या अपहरणकर्त्यांचे नाव समोर आल्यानंतर पोलिसांना धक्का बसला. अपहरणकर्त्याची सुद्धा एका महिन्यापासून पोलिस दस्ताऐवजाता बेपत्ता अशी नोंद होती.
शहर पोलिसांनी या दोन्ही चिमुकल्या बहिणींना वर्धा येथून ताब्यात घेतले. सध्या त्या बाल कल्याण समितीच्या ताब्यात आहे.मात्र, तब्बल दोन दिवस या अपहरणाने पोलिसांची झोप उडविली. या अपहरण नाट्याची सुरुवात यवतमाळ जिल्ह्यातील वणी येथील कौटुंबिक वादातून झाली. वरोरा येथील संगीताचा (नाव बदलले आहे) विवाह वणी येथे झाला. संसाराचा सुरुवातीचा गाडा आनंदात सुरू होता. दरम्यान, दाम्पत्याला दोन मुलीही झाल्या. त्यानंतर मात्र त्यांच्यात खटके उडायला सुरुवात झाली.
दोन्ही मुलींना वडिलांकडे सोडून योगिता माहेरी परतली. एका महिन्यापूर्वी अचानक योगिता बेपत्ता झाली. कुटुंबीयांनी तिच्या बेपत्ता होण्याची तक्रार वरोरा पोलिस स्टेशनमध केली आहे. दुसरीकडे दोन्ही मुली वडिलांसह वणी येथून चंद्रपुरातील भिवापूर वॉर्डात राहणाऱ्या नातेवाईकाकडे तीन दिवसांपूर्वी आल्या. अंगणात खेळत असताना सकाळी नऊ वाजताच्या सुमाराला दोन्ही मुली दिसेनासे झाल्या. बराच वेळ शोध घेतल्यानंतर दुपारी चंद्रपूर शहर पोलिस ठाण्यात तक्रार दाखल केली.
पाच आणि सहा वर्षांच्या मुलींच्या अपहरणाचे प्रकरण असल्याने पोलिस यंत्रणाही सतर्क झाली. स्वत: जिल्हाचे पोलिस अधीक्षक अरविंद साळवे यांनी सूत्र हातात घेतली आणि शहर पोलिस ठाण्यात ठाण मांडून बसले. जिल्ह्यात सर्वत्र नाकाबंदी करण्यात आली. पोलिस स्टेशनला अपहरणाची सूचना देण्यात आली. मात्र, पहिल्या दिवशी पोलिसांच्या हाती काहीच लागले नाही. शेवटी मुली बेपत्ता झाल्या त्या परिसरातील सीसीटीव्ही फुटेज पोलिसांनी तपासले.
एक तीस-बत्तीस वर्षांची महिला दोन्ही मुलींना घेऊन जाताना दिसली. पोलिसांनी बेपत्ता मुलीचे वडील आणि नातेवाईकांना हे फुटेज दाखविले आणि साऱ्यांनाच धक्का बसला. या मुलींना घेऊन जाणारी त्यांची आई संगीता होती. अपहरण कर्त्यांचा शोध लागला. मात्र, पोलिस दप्तरी मागील एका महिन्यापासून योगिता बेपत्ता असल्याची नोंद होती. त्यामुळे तिचा ठावठिकाणा शोधण्याचे आव्हान पोलिसांसमोर उभे ठाकले. शेवटी पोलिसांनी नातेवाईकांची झाडाझडती घेतली. तेव्हा एका नातेवाईकाच्या संपर्कात संगीता असल्याचे समोर आले.
खोली भाड्याने घेऊन ती राहायची:-
पोलिसांना तिचा भ्रमणध्वनी क्रमांक नातेवाईकांकडून भेटला. पोलिसांनी सीडीआर तपासला आणि संगीताचे 'लोकशेन' मिळाले. ती एका महिन्यापासून वर्धा येथे खोली भाड्याने घेऊन राहत होती. पोलिस उपनीरीक्षक शैलेश जगताप यांच्या नेतृत्वातील पथकाने संगीता आणि दोन्ही मुलींना ताब्यात घेतले. मुलींना बाल कल्याण समितीकडे सोपविण्यात आले. याप्रकरणात पोलिसांनी अपहरणाचा गुन्हा दाखल केला आहे.
आई-वडिलांचा जीव भांड्यात:-
दोन्ही मुली वडिलांसह चंद्रपुरात येत असल्याची माहिती संगीताला नातेवाईकाने दिली होती. दोन्ही मुली मिळाल्याने वडिलांचा आणि संगीता सापडल्याने तिच्या आई-वडिलांचा जीव भांड्यात पडला. अठ्ठेचाळीस तासापासून राबविलेल्या शोध मोहीमेला यश आल्याने पोलिसांनीही सुटकेचा नि:श्‍वास सोडला आणि अपहरणनाट्याचा शेवट झाला.