जिल्हास्तरीय युथ पार्लमेंटसाठी चंद्रपूर सज्ज
चंद्रपूर:- जिल्हयातील युवकांच्या नेतृत्वगुणांना वाव देण्यासाठी आणि भारतीय लोकशाहीची मूल्ये रुजवण्यासाठी एक अत्यंत महत्त्वाचे पाऊल उचलण्यात आले आहे. केंद्र सरकारचा 'युवा कार्यक्रम एवं खेल मंत्रालय', 'मेरा युवा भारत' आणि 'सरदार पटेल महाविद्यालय' यांच्या संयुक्त विद्यमाने येत्या ५ मार्चला जिल्हास्तरीय 'विकसित भारत युथ पार्लमेंट'चे आयोजन करण्यात आले आहे.
चंद्रपूरच्या सरदार पटेल महाविद्यालयातील राष्ट्रीय सेवा योजना (NSS) विभागात सध्या मोठ्या कार्यक्रमाची तयारी सुरू आहे. महाविद्यालयाचे प्राचार्य डॉ. पी. एम. काटकर यांच्या मार्गदर्शनाखाली हा सोहळा पार पडणार आहे. यंदाच्या युथ पार्लमेंटचा विषय अतिशय गंभीर आणि विचार करायला लावणारा आहे:
"आणीबाणीचे ५० वर्ष: भारतीय लोकशाहीचे धडे"
या उपक्रमाचे मुख्य उद्दिष्ट म्हणजे १८ ते २५ वयोगटातील युवकांमध्ये लोकशाही मूल्यांची जाणीव निर्माण करणे, त्यांना जबाबदार नागरिक बनवणे आणि त्यांच्यातील नेतृत्वगुणांचा विकास करणे. केवळ चर्चाच नाही, तर विचारमंथनाच्या माध्यमातून भारतीय लोकशाहीने इतिहासातून काय धडे घेतले, यावर येथे प्रकाश टाकला जाईल.
या स्पर्धेतील सर्वाधिक लक्षवेधी बाब म्हणजे, जिल्हा पातळीवर उत्कृष्ट कामगिरी करणाऱ्या पाच विद्यार्थ्यांची निवड थेट मुंबई येथे होणाऱ्या राज्यस्तरीय युथ पार्लमेंटसाठी केली जाणार आहे. ही राज्यस्तरीय संसद विधानभवनात पार पडणार असून, चंद्रपूरच्या युवकांना मोठ्या व्यासपीठावर आपली मते मांडण्याची ही सुवर्णसंधी आहे.