चंद्रपूर विधानसभेसाठी २०२९ चे रणशिंग फुंकले
चंद्रपूर:- राज्याचे माजी मंत्री आणि भाजपचे ज्येष्ठ नेते सुधीर मुनगंटीवार यांनी २०२९ च्या विधानसभा निवडणुकीसाठी आतापासूनच मोठे संकेत दिले आहेत. "मी चंद्रपूरचाच आमदार आहे आणि २०२९ मध्ये पुन्हा चंद्रपूरला येणारच," असे विधान करत त्यांनी स्थानिक राजकारणात खळबळ उडवून दिली आहे.
चंद्रपूर येथील पत्रकार गृहनिर्माण सहकारी संस्थेच्या सदनिका बांधकामाच्या पायाभरणी समारंभात मुनगंटीवार बोलत होते. यावेळी व्यासपीठावर माजी खासदार नरेश पुगलिया यांचीही उपस्थिती होती.
गेल्या अनेक वर्षांपासून बल्लारपूर मतदारसंघाचे प्रतिनिधित्व करणाऱ्या मुनगंटीवारांनी आपल्या भाषणात जुन्या आठवणींना उजाळा दिला. "२० वर्षांपूर्वी मतदारसंघाची पुनर्रचना झाली आणि चंद्रपूर मतदारसंघ अनुसूचित जातीसाठी राखीव झाला, त्यामुळे नाईलाजास्तव मला बल्लारपूरला जावे लागले," अशी खंत त्यांनी व्यक्त केली.
२०२७ मध्ये मतदारसंघांची पुन्हा पुनर्रचना होणार आहे. या पुनर्रचनेत चंद्रपूर मतदारसंघ खुला (आरक्षणविरहित) होण्याची त्यांना खात्री आहे. २०२९ च्या निवडणुकीत ते पुन्हा चंद्रपूर विधानसभा मतदारसंघातून निवडणूक लढवणार. या संदर्भात मुख्यमंत्री देवेंद्र फडणवीस यांच्याशी त्यांची प्राथमिक चर्चाही झाली आहे.
मुनगंटीवारांच्या या विधानामुळे सध्याचे आमदार किशोर जोरगेवार यांच्या अडचणी वाढण्याची शक्यता आहे. जोरगेवार हे सध्या महायुतीचे (भाजपचे) प्रतिनिधित्व करत आहेत. जर मुनगंटीवार २०२९ मध्ये चंद्रपुरात परतले, तर जोरगेवार यांना नवा मतदारसंघ शोधावा लागेल किंवा भाजपमध्ये तिकिटावरून मोठा संघर्ष पाहायला मिळेल.
मुनगंटीवारांनी आतापासूनच २०२९ ची तयारी सुरू केल्याचे यावरून स्पष्ट होत आहे. मात्र, या विधानावर आमदार किशोर जोरगेवार किंवा भाजपचे वरिष्ठ नेतृत्व काय भूमिका घेते, हे पाहणे महत्त्वाचे ठरेल.