चंद्रपूर जिल्हा व सत्र न्यायालयात न्यायाधीशांना गौरवपूर्ण निरोप.

चंद्रपूर जिल्हा व सत्र न्यायालयात न्यायाधीशांना गौरवपूर्ण निरोप.

चंद्रपूर:- जिल्हा व सत्र न्यायालय, चंद्रपूर येथील बदली झालेल्या न्यायाधीशांच्या सन्मानार्थ आयोजित निरोप समारंभ अत्यंत उत्साहपूर्ण व भावनिक वातावरणात संपन्न झाला. जिल्हा न्यायालयातील रूम क्रमांक 12 येथे पार पडलेल्या या कार्यक्रमाचे आयोजन चंद्रपूर जिल्हा बार असोसिएशनतर्फे करण्यात आले होते.

   याप्रसंगी जिल्हा व सत्र न्यायाधीश एल. डी. बिले, मुख्य न्यायदंडाधिकारी पी. पी. कुलकर्णी, दिवाणी न्यायाधीश (वरिष्ठ स्तर) डी. ए. तिवारी व एस. व्ही. थोडगे तसेच न्यायदंडाधिकारी प्रथम श्रेणीतील एन. आर. गोरले व आर. एस. कपिल यांचा सन्मानचिन्ह देऊन सत्कार करण्यात आला. त्यांच्या कार्यकाळातील उल्लेखनीय कामगिरी, न्यायनिष्ठा, प्रामाणिकता आणि न्यायव्यवस्थेतील योगदानाचा यावेळी विशेष गौरव करण्यात आला.

    कार्यक्रमाच्या अध्यक्षस्थानी अॅड. विक्रम टंडन होते. त्यांनी आपल्या अध्यक्षीय भाषणात सत्कारमूर्तींच्या कार्याचा आढावा घेत त्यांच्या न्यायदानातील नीतिमत्ता व संवेदनशीलतेचे कौतुक केले. तसेच न्यायव्यवस्थेतील बदलत्या आव्हानांवर भाष्य करत न्यायालयीन अधिकारी व अधिवक्त्यांमधील समन्वयाचे महत्त्व अधोरेखित केले.

विशेष अतिथी म्हणून बार असोसिएशन चंद्रपूरचे उपाध्यक्ष  अॅड. अमन मारेकर उपस्थित होते.

     कार्यक्रमात सत्कारमूर्तींनीही आपल्या भावना व्यक्त करताना चंद्रपूर येथील कार्यकाळातील अनुभव सांगितले. बार व बेंचमधील सुसंवाद, सहकार्य व परस्पर आदरामुळे न्यायदान प्रक्रिया अधिक सक्षम झाली असे त्यांनी नमूद केले. तसेच चंद्रपूर जिल्ह्यातील अधिवक्त्यांनी दिलेल्या सहकार्याबद्दल त्यांनी मनःपूर्वक आभार मानले.

    कार्यक्रमाचे प्रभावी सूत्रसंचालन अॅड. अभिजित किन्हीकर यांनी केले. त्यांनी संपूर्ण कार्यक्रमाला एकसंध व आकर्षक स्वरूप दिले. आभार प्रदर्शन अॅड. रोशनी कांबळे यांनी व्यक्त केले. त्यांनी उपस्थित मान्यवर, अधिवक्ता तसेच आयोजनात सहकार्य करणाऱ्या सर्वांचे आभार मानले.

    या कार्यक्रमाला वरिष्ठ व कनिष्ठ अधिवक्त्यांची मोठ्या संख्येने उपस्थिती लाभली होती. न्यायालयीन वातावरणात स्नेह, आदर व कृतज्ञतेचा संगम अनुभवायला मिळाल्याने उपस्थितांनी समाधान व्यक्त केले.

     कार्यक्रमाच्या यशस्वी आयोजनासाठी चंद्रपूर जिल्हा बार असोसिएशनच्या सर्व पदाधिकारी, कार्यकारिणी सदस्यांनी विशेष परिश्रम घेतले. एकूणच हा निरोप समारंभ न्यायालयीन परंपरा, संस्कृती व परस्पर सन्मान जपणारा आणि दीर्घकाळ स्मरणात राहणारा ठरला.