गडचिरोली:- 'फेसबुक'वर झालेल्या मैत्रीचे नंतर प्रेमात रूपांतर झाले, एकमेकाच्या साथीने पुढील आयुष्य जगण्याच्या आणाभाका घेतल्या. पण भूतकाळ लपविल्याच्या रागातून प्रेयसीची ओढणीने गळा आवळून हत्या केली.
गडचिरोली जिल्ह्यात खळबळ उडवून देणाऱ्या पोर्ला येथील खुनाचा अवघ्या 24 तासात उलगडा करण्यात गुन्हे शाखेला यश आहे. निखील दिवाकर मोहुर्ले (22,रा.वैरागड) असे आरोपीचे नाव आहे.
शहरापासून 16 किलोमीटर अंतरावरील पोर्ला येथील जंगलात अनोळखी युवतीची ओढणीने गळा आवळून हत्या केल्याची खळबजनक घटना 22 डिसेंबरला दुपारी 12 वाजता उघडकीस आली होती. मृत युवती अर्धनग्न अवस्थेत होती, शिवाय घटनास्थळी दारुची रिकामी बाटली आढळली होती, त्यामुळे या घटनेचे गूढ वाढले होते.
पोलीस अधीक्षक नीलोत्पल यांनी तातडीने चार पथके नेमून तास गतिमान केला. चंद्रपूरच्या रामनगर ठाणे हद्दीतून एक युवती बेपत्ता असल्याची माहिती पुढे आली, त्यानंतर मृत युवतीची ओळख पटली. ती बीए प्रथम वर्षात शिकत होती तर निखीलचे बीएसस्सीर्पंत शिक्षण झालेले असून सध्या तो वाद्यकलावंत म्हणून काम करतो. वैरागडमधून 22 डिसेंबरला रात्री पोलिसांनी त्यास बेड्या ठोकल्या. सुरुवातीला त्याने टाळाटाळ केली, पण पोलिसी खाक्यापुढे त्याचा निभाव लागला नाही. नंतर त्याने संपूर्ण थरारपट उलगडला.
मृत युवती व निखील यांची दीड वर्षांपासून मैत्री होती. फेसबुकवर त्यांची ओळख झाली होती, त्याचेरुपांतर मैत्रीत व नंतर प्रेमात झाले. दोघांनीही लग्न करण्याचा निर्णय घेतला होता,पण आपले जिच्यावर प्रेम आहे तिच्या आयुष्यात आधी एक युवक होता, ही बाब निखीलला कळाल्यानंतर दोघांत बिनसले. ही माहिती का लपवून ठेवली, यावरुन निखीलने तिच्याशी वाद घातला होता. अखेर त्याने तिला थंड डोक्याने संपविले. गुन्हे शाखेचे निरीक्षक उल्हास भुसारी, सहायक निरीक्षक राहुल आव्हाड, उपनिरीक्षक नीलेशकुमार वाघ, श्रीकांत बोईना, प्रशांत गरफडे, कृष्णा परचाके, दीपक लोणारे, माणिक निसार, माणिक दुधबळे, सतीश कत्तीवार, मनोहर तोगरवार, गडचिरोली ठाण्याचे पो.नि. अरुण फेगडे , उपनिरीक्षक विशाखा म्हेत्रे, भाऊराव बोरकर यांनी ही कारवाई केली.
टिप्पणी पोस्ट करा