पोंभुर्णा:- शिक्षण म्हणजे फक्त पुस्तकी ज्ञान नाही, तर ती आहे आयुष्याची एक नवी सुरुवात. आणि या सुरुवातीला जर जल्लोषाची जोड मिळाली, तर मुलांचा शाळेचा प्रवास अधिकच आनंददायी होतो. असंच काहीसं आज चेक आष्टा येथील जिल्हा परिषद शाळेत पाहायला मिळालं, जिथे 'चला... शाळेत जाऊ या!' या घोषणेने शाळा अक्षरशः दुमदुमून गेली होती.
प्रवेशोत्सव... म्हणजे शाळेत पहिल्यांदा पाऊल टाकणाऱ्या चिमुकल्यांचं उत्साहात स्वागत. हा केवळ एक सोहळा नाही, तर मुलांच्या आयुष्यातील एक महत्त्वाचा आणि भावनिक क्षण आहे. चेक आष्टा जिल्हा परिषद शाळेने हा क्षण मुलांसाठी अविस्मरणीय बनवला. आज या शाळेत प्रवेशोत्सव सोहळा मोठ्या उत्साहात आणि जल्लोषात साजरा करण्यात आला.
आपल्या पाल्यांच्या नवीन शैक्षणिक प्रवासाबद्दल पालकांमध्येही प्रचंड उत्साह दिसून येत होता. शाळेच्या या उपक्रमाचं अनेक पालकांनी कौतुक केलं, ज्यामुळे मुलांमध्ये शाळेबद्दल आपुलकीची भावना निर्माण होईल अशी आशा त्यांनी व्यक्त केली. चेक आष्टा जिल्हा परिषद शाळेने आज केवळ विद्यार्थ्यांचं स्वागतच नाही केलं, तर एक महत्त्वाचा संदेश दिला की, शिक्षण हे ओझं नाही, तर ते एक आनंददायी आणि उत्साहपूर्ण पर्व आहे.
यावेळी प्रशासनिक पर्यवेक्षक म्हणून लाभलेले श्रीमती वंदना बावणे, अरुण यामावार मुख्याध्यापक जि. प. प्रा. शाळा चेक आष्टा, जगन्नाथ येलके उपसरपंच चेक आष्टा, विलास मोगरकर सरपंच देवाडा खुर्द, प्रभाकर मरस्कोल्हे अध्यक्ष शाळा व्यवस्थापन समिती चेक आष्टा, सीमाताई मरस्कोल्हे अंगणवाडी सेविका चेक आष्टा, मुरलीधर सोनटक्के, गीता मडावी, रंजना दिवसे, निलीमा गुंजेकार सदस्य शाळा व्यवस्थापन समिती चेक आष्टा, तुळशीदास पाटील, सविता लाकडे मॅडम, विनोद पोगुलवार सर, संदीप पेंदोर सर, शंकर कन्नाके सर, सतीश शिंगाडे सर, परशुराम गेडाम उपस्थित होते.