चंद्रपूर:- चंद्रपूर शहरातून एक मोठी बातमी समोर येत आहे. सध्या सुरू असलेल्या टी-२० वर्ल्ड कपमधील भारत विरुद्ध दक्षिण आफ्रिका या हाय-व्होल्टेज सामन्यावर ऑनलाईन सट्टा लावणाऱ्या एका इसमाला स्थानिक गुन्हे शाखेने रंगेहात अटक केली आहे. पोलीस अधीक्षक मुम्मका सुदर्शन यांच्या विशेष मोहिमेअंतर्गत ही कारवाई करण्यात आली.
मिळालेल्या माहितीनुसार, चंद्रपूर शहरातील रहमतनगर परिसरात राहणारा हारिश उर्फ बिट्टू अली हा आपल्या घराशेजारील मोकळ्या प्लॉटमध्ये बसून मोबाईलवर क्रिकेटचा सट्टा घेत असल्याची गोपनीय माहिती स्थानिक गुन्हे शाखेला मिळाली होती. या माहितीच्या आधारे पोलिसांनी सापळा रचून आरोपी सय्यद हारिश उर्फ बिट्टू मुकद्दर अली (वय ३०) याला ताब्यात घेतले.
कारवाईचा तपशील:
पोलिसांनी जेव्हा आरोपीच्या 'मोटोरोला' कंपनीच्या मोबाईलची झडती घेतली, तेव्हा त्यात nice7777 या आयडीवरून ऑनलाईन सट्टा सुरू असल्याचे स्पष्ट झाले. पोलिसांनी तातडीने आरोपीला अटक करून त्याच्याविरुद्ध चंद्रपूर शहर पोलीस ठाण्यात 'महाराष्ट्र जुगार कायद्याच्या कलम १२ (अ)' अन्वये गुन्हा दाखल केला आहे.
नागपूर कनेक्शन उघड:
या तपासात धक्कादायक माहिती समोर आली आहे. आरोपीने हा ऑनलाईन आयडी इरफान कुरेशी (रा. हवेली गार्डन, चंद्रपूर) याच्या माध्यमातून नागपूर येथील अफजल शेख याच्याकडून मिळवल्याचे कबूल केले आहे. पोलीस आता या रॅकेटमधील इतर साथीदारांचा शोध घेत आहेत.
हे आहेत कारवाई करणारे अधिकारी:
सदर कारवाई पोलीस अधीक्षक मुम्मका सुदर्शन, अपर पोलीस अधीक्षक ईश्वर कातकडे यांच्या मार्गदर्शनाखाली स्थानिक गुन्हे शाखेचे पोलीस निरीक्षक अमोल काचोरे यांच्या नेतृत्वात करण्यात आली. या पथकात पोउपनि विनोद भुरले, सुनील गौरकार आणि सुभाष गोहोकार, सतिश अवथरे, दिपक डोंगरे, इम्रान खान यांच्यासह अन्य पोलीस कर्मचाऱ्यांचा समावेश होता.