कोरपना:- गडचांदूर येथून एक दिलासादायक बातमी येत आहे. प्रहार संघटनेच्या अथक प्रयत्नांमुळे गडचांदूर नगरपरिषदेने दिव्यांगांसाठी राखीव असलेला ५% निधी अखेर वितरित केला आहे.
गडचांदूर येथे गेल्या तीन महिन्यांपासून रखडलेला दिव्यांगांचा राखीव ५% निधी अखेर वाटप करण्यात आला आहे. प्रहार संघटनेने या प्रकरणी पुढाकार घेत दिव्यांग बांधवांना सोबत घेऊन गडचांदूर नगरपरिषदेचे मुख्याधिकारी चव्हाण यांची भेट घेतली आणि तातडीने निधी वाटप करण्याची मागणी केली.
नगरपरिषदेच्या वार्षिक उत्पन्नातून ५% निधी दिव्यांगांच्या कल्याणासाठी निश्चित करावा, अशी मागणी प्रहार संघटनेने केली होती. या मागणीला सकारात्मक प्रतिसाद देत हा निधी वितरित करण्यात आला. मुख्याधिकाऱ्यांसोबत झालेल्या चर्चेनंतर सकारात्मक तोडगा निघाला आणि सर्व दिव्यांग बांधवांच्या खात्यात डीबीटी (डायरेक्ट बेनिफिट ट्रान्सफर) पद्धतीने हा निधी जमा करण्यात आला. या निधीमुळे दिव्यांग बांधवांच्या विविध गरजा पूर्ण होण्यास मदत होणार आहे, ज्यामुळे त्यांचा सामाजिक आणि आर्थिक विकास सुलभ होईल.
गडचांदूर परिसरातील दिव्यांगांच्या हितासाठी हा निधी महत्त्वाचा ठरणार असून, नगरपरिषदेच्या या सकारात्मक पावलामुळे स्थानिक समाजामध्ये एक नवी ऊर्जा निर्माण झाली आहे.
यावेळी राजुरा विधानसभेचे आमदार देवराव भोंगळे, नगरपरिषद मुख्याधिकारी चव्हाण, प्रहार जिल्हाध्यक्ष सतीश बिडकर, कोरपना तालुका प्रमुख विनोद शिंदे, सतीश शेरे, प्रफुल्ल देवलकर, अनुप राखुंडे, दिनेश राठोड, महादेव बेरड, निलेश मुरमुरबार, नितीन सपकाळ, सूरज बार, सरोज मडावी, वाजिद, अमित कनोजिया, राकेश शेंद्रे, पवन येणगुंटीवार यांच्यासह अनेक कार्यकर्ते आणि दिव्यांग बांधव मोठ्या संख्येने उपस्थित होते.
या प्रसंगी, प्रहारचे सतीश बिडकर यांनी आमदार देवराव भोंगळे यांच्याकडे दिव्यांगांसाठी स्वतंत्र दिव्यांग भवन मंजूर करून ते उपलब्ध करून देण्याची मागणी केली. उपस्थित दिव्यांग बांधवांना यावेळी संविधान भेट म्हणून देण्यात आले.