चंद्रपूर:- जिल्ह्यातील पोलीस भरतीची तयारी करणाऱ्या उमेदवारांनी महाराष्ट्र शासनाकडे, विशेषतः मुख्यमंत्री तथा गृहमंत्री देवेंद्र फडणवीस यांच्याकडे, महत्त्वाच्या मागण्यांचे एक निवेदन पाठवले आहे. या निवेदनात २०२४-२५ मधील पोलीस शिपाई भरती प्रक्रिया लवकरात लवकर सुरू करण्याची मागणी करण्यात आली आहे.
राज्यात पोलीस शिपाई पदांसाठी तयारी करत असलेल्या उमेदवारांनी मुख्यमंत्री देवेंद्र फडणवीस यांना उद्देशून एक विनंती पत्र लिहिले आहे. हे पत्र आमदार सुधीर मुनगंटीवार यांच्यामार्फत मंत्रालयाला पाठवण्यात आले आहे.
या पत्रात, गृह विभागातील २०२४-२५ या वर्षातील रिक्त असलेल्या पोलीस शिपाई पदांची भरती प्रक्रिया तातडीने सुरू करण्याची आणि त्याची जाहिरात प्रसिद्ध करून अर्ज भरण्यास सुरुवात करण्याची मागणी करण्यात आली आहे.
उमेदवारांची मुख्य मागणी अशी आहे की, चालू वर्षातील सर्व रिक्त पदांची भरती एकत्रितपणे घेण्यात यावी. यामुळे प्रशासनावरचा ताण कमी होईल आणि भरती प्रक्रिया अधिक सोप्या पद्धतीने पूर्ण होईल, असे त्यांचे म्हणणे आहे.
यासोबतच, मागील भरती प्रक्रियेत तांत्रिक अडचणींमुळे अनेक उमेदवारांना अर्ज भरता आले नाहीत, असेही निवेदनात नमूद करण्यात आले आहे. या पार्श्वभूमीवर, मुख्यमंत्री महोदयांनी दिलेल्या शब्दानुसार, वयोमर्यादेत सवलत देणारा शासन निर्णय तात्काळ प्रकाशित करावा, अशी जोरदार मागणी करण्यात आली आहे, जेणेकरून सर्व पात्र उमेदवारांना पोलीस भरतीसाठी अर्ज भरण्याची संधी मिळेल. महाराष्ट्रातील १७ लाखांहून अधिक पोलीस भरती उमेदवार मागणी करत आहेत की, १५,००० पेक्षा जास्त जागांसाठी भरती काढून त्यांना एक संधी दिली जावी. या मागणीवर मुख्यमंत्री सकारात्मक विचार करतील अशी आशा सर्व पोलीस भरती करणाऱ्या विद्यार्थ्यांनी व्यक्त केली आहे.
आता पाहूया, राज्य सरकार या मागणीवर काय निर्णय घेते. पोलीस भरती उमेदवारांच्या आशा मुख्यमंत्र्यांच्या प्रतिसादाकडे लागल्या आहेत.