जंगलात फिरायला गेलेल्या प्रेमीयुगुलांवर वाघाचा हल्ला #tiger #tigerattack


गडचिरोली:- गडचिरोली आणि चंद्रपूरमध्ये गेल्या काही दिवसांपासून वाघांचे माणसांवर हल्ले करण्याच्या घटना वारंवार घडत आहे. वाघाच्या हल्ल्यात अनेकांचा हकनाक बळी गेला आहे. अशीच एक घटना गडचिरोलीमध्ये घडली आहे. मैत्रिणीसोबत फिरण्यासाठी आलेल्या तरुणावर वाघाने हल्ला केला. या हल्ल्या तरुणाचा मृत्यू झाला आहे.
गडचिरोली जिल्ह्यातील उसेगावच्या जंगलात ही घटना घडली आहे. अजित नाकाडे असं मृत तरुणाचे नाव आहे. देसाईगंज तालुक्यात कोरेगाव चोप इथं राहणार अजित नाकाडे हा आपल्या मैत्रिणीसोबत उसेगावच्या जंगलात फिरण्यासाठी आला होता. जंगलात फिरत असताना त्यांना काही स्थानिकांनी पाहिले आणि हे वाघाचे क्षेत्र आहे, पुढे जाऊ नका असा सल्ला दिला होता.
पण, ग्रामस्थांना सल्ला झुगारून अजित आपल्या मैत्रिणीसोबत जंगलात फिरण्यासाठी गेला. जंगलात एका ठिकाणी बसलेले असताना अचानक वाघाने दोघांवर हल्ला केला. वाघाने अचानक हल्ला केल्यामुळे दोघांचा एकच गोंधळ उडाला. जीव वाचवण्यासाठी दोघांनी प्रयत्न केला.
पण, वाघाने तोपर्यंत अजितचा पडशा पाडला होता. तर त्याची मैत्रीण जखमी झाली जंगलात आरडाओरडा ऐकू आल्यामुळे ग्रामस्थांनी धाव घेतली. त्यामुळे वाघाने जंगलात धूम ठोकली.
घटनेची माहिती तातडीने वनअधिकाऱ्यांना देण्यात आली. वनअधिकाऱ्यांनी घटनास्थळी धाव घेतली. मृत अजितचा मृतदेह जंगलातून आणण्यात आला आहे, तर जखमी तरुणीला उपचारासाठी रुग्णालयात दाखल करण्यात आले आहे. या घटनेमुळे गावात एकच खळबळ उडाली आहे

कोणत्याही टिप्पण्‍या नाहीत