नवी दिल्ली:- संपूर्ण देशाचे लक्ष लागलेल्या महाराष्ट्र विधानसभा निवडणुकीचं बिगुल अखेर वाजलं असून, केंद्रीय निवडणूक आयुक्त राजीव कुमार यांनी पत्रकार परिषदेत सविस्तर कार्यक्रम आज (दि. 15) जाहीर केला आहे. जाहीर करण्यात आलेल्या कार्यक्रमानुसार महाराष्ट्रात एकाच टप्प्यात निवडणुका पार पडणार आहेत.
मतदान 20 नोव्हेंबरला होणार असून निकाल 23 नोव्हेंबरला घोषित केले जाणार आहेत.
शिवसेना आणि राष्ट्रवादी काँग्रेस हे दोन प्रमुख पक्ष फुटल्यानंतर ही पहिली विधानसभेची निवडणूक होत आहे. यामुळे राज्याच्या राजकारणासाठी ही निवडणूक महत्त्वाची असणार आहे. निवडणुकांच्या तारखांची घोषणा झाल्याने आजपासून आदर्श आचारसंहिता लागू होणार आहे.
असा असेल मतदान कार्यक्रम.....
राजपत्र अधिसूचना जारी करण्याची तारीख 22 ऑक्टोबर 2024, नामांकन दाखल करण्याची शेवटची तारीख 29 ऑक्टोबर 2024, नामांकन छाननीची तारीख 30 ऑक्टोबर 2024, उमेदवारी अर्ज मागे घेण्याची शेवटची तारीख 04 नोव्हेंबर 2024, मतदानाची तारीख 20 नोव्हेंबर 2024, मतमोजणीची तारीख 23 नोव्हेंबर 2024