चंद्रपूर:- मध्य चांदा वन विभागाच्या पोंभुर्णा वनपरिक्षेत्रात एका नर वाघाचा मृत्यू झाल्याची घटना उघडकीस आली आहे. पिपरी दीक्षित नियतवन क्षेत्रातील एका तलावाच्या झुडपामध्ये या वाघाचा मृतदेह आढळून आला आहे. या घटनेमुळे संपूर्ण वनविभागात आणि परिसरात एकच खळबळ उडाली आहे.
मिळालेल्या माहितीनुसार, आज म्हणजेच २० जून २०२६ रोजी सकाळी साडेदहा वाजताच्या सुमारास, वन कर्मचारी नेहमीप्रमाणे गस्तीवर होते. दरम्यान, पिपरी दीक्षित मधील संरक्षित वनकक्ष क्रमांक ५४३ मधील तलाव परिसरात असलेल्या बेशरमच्या झुडपातून प्रचंड दुर्गंधी येत असल्याचं वन कर्मचाऱ्यांच्या लक्षात आलं. कर्मचाऱ्यांनी जवळ जाऊन पाहिले असता, तिथे एक नर वाघ मृतावस्थेत आढळून आला. वाघाचा मृत्यू साधारणपणे ४८ तासांपूर्वी म्हणजेच दोन दिवसांआधी झाला असावा, असा अंदाज वर्तवला जात आहे.
या घटनेची पार्श्वभूमी पाहता, याच भागात गेल्या १२ जून रोजी या वाघाने काही पाळीव म्हशींवर हल्ला केला होता. प्राथमिक माहितीनुसार, वाघाने ६ म्हशींवर हल्ला केला होता, ज्यामध्ये म्हशी जखमी झाल्या होत्या. वनविभागाच्या प्राथमिक अंदाजानुसार, म्हशींनी केलेल्या प्रतिहल्ल्यात आणि प्रतिकारामुळे वाघालाही गंभीर दुखापत झाली असावी आणि याच जखमांमुळे त्याचा मृत्यू झाला असावा. मात्र, घटनास्थळाची पाहणी केली असता मृत वाघाचे सर्व अवयव शाबूत असल्याचे दिसून आले आहे, ज्यामुळे शिकारीचा संशय तूर्तास मावळला आहे.
घटनेची माहिती मिळताच उपवनसंरक्षक योगेश वाघाये आणि वरिष्ठ अधिकाऱ्यांनी घटनास्थळी धाव घेतली. पशुवैद्यकीय अधिकाऱ्यांमार्फत शवविच्छेदन करून एनटीसीए (NTCA) च्या नियमांनुसार मृत वाघावर दहन संस्कार करण्यात आले आहेत. वाघाच्या मृत्यूचे नेमके कारण काय होते आणि त्याचा मृत्यू नेमका कधी झाला, हे शवविच्छेदन अहवाल आल्यानंतरच स्पष्ट होईल.