Chandrapur Police : बालसुधारगृहातून पलायन केलेल्या सहाही अल्पवयीन मुलींचा हिंगणघाट येथे शोध!

Bhairav Diwase
चंद्रपूर:- चंद्रपूर शहरातील सिव्हिल लाईन्स परिसरातील बालसुधारगृहातून सहा अल्पवयीन मुलींनी पलायन केल्याची घटना दिनांक १९ नोव्हेंबर २०२६ रोजी सायंकाळी घडली. या घटनेची माहिती मिळताच रामनगर पोलिसांनी तातडीने शोधमोहीम हाती घेतली. शहरातील ३५ सीसीटीव्ही कॅमेऱ्यांचे फुटेज तपासणे, सायबर पोलिसांची मदत घेणे, तांत्रिक पुराव्यांचे विश्लेषण करणे आणि गोपनीय बातमीदारांकडून माहिती संकलित करणे अशा विविध माध्यमांतून तपासाची चक्रे वेगाने फिरविण्यात आली. अखेर दिनांक २० नोव्हेंबर रोजी पहाटे हिंगणघाट, जिल्हा वर्धा येथे हिंगणघाट पोलिसांच्या मदतीने व महिला पोलीस अंमलदारांच्या सहकार्याने सहाही मुलींचा शोध घेऊन त्यांना सुरक्षितपणे ताब्यात घेण्यात रामनगर पोलिसांना यश आले.

नेमकी घटना काय?

दिनांक १९/११/२०२६ रोजी सायंकाळी १७:२० वा. दरम्यान बालसुधारगृह, सिव्हिल लाईन्स, चंद्रपूर येथे समुपदेशनासाठी दाखल असलेल्या अल्पवयीन मुलींपैकी एका मुलीने काचेचा ग्लास फोडून त्याचा तुकडा हातात घेतला व सुरक्षा रक्षक जवळ आल्यास त्यांना मारण्याची धमकी दिली. त्यानंतर सदर मुलीसह अन्य पाच अल्पवयीन मुलींनी बालसुधारगृहाच्या भिंतीवरून उडी मारून पलायन केले. याप्रकरणी सुरक्षा रक्षक यांनी दिलेल्या तक्रारीवरून पोलीस स्टेशन रामनगर येथे अप. क्र. १२८४/२०२६, कलम १३७ (२) भारतीय न्याय संहिता अन्वये गुन्हा दाखल करण्यात आला.


वरिष्ठ पोलीस अधिकाऱ्यांची घटनास्थळी भेट; सहा स्वतंत्र पथकांची नियुक्ती

घटनेचे गांभीर्य लक्षात घेऊन मा. पोलीस अधीक्षक श्री. आयुष नोपानी व मा. अपर पोलीस अधीक्षक श्री. ईश्वर कातकडे, उपविभागीय पोलीस अधिकारी चंद्रपुर श्री. प्रमोद चौगुले यांनी घटनास्थळी भेट देऊन परिस्थितीचा आढावा घेतला. पलायन केलेल्या सहाही मुलींचा तातडीने शोध घेण्याच्या दृष्टीने सहा स्वतंत्र पोलीस पथके तयार करण्यात आली. या पथकांना आवश्यक सूचना व मार्गदर्शन करून शोधकार्याला गती देण्यात आली.


३५ सीसीटीव्ही कॅमेऱ्यांचे फुटेज तपासून पोलिसांनी घेतला मागोवा

पोलीस निरीक्षक प्रभवती एकुरके यांच्या मार्गदर्शनाखाली रामनगर पोलीस स्टेशनच्या अधिकारी व अंमलदारांची स्वतंत्र पथके तयार करून प्रत्येक पथकाला वेगवेगळी जबाबदारी सोपविण्यात आली. सदर शोधमोहीम केवळ सीसीटीव्ही फुटेज तपासण्यापुरती मर्यादित न ठेवता विविध दिशांनी व्यापक स्वरूपात राबविण्यात आली. यामध्ये चंद्रपूर शहरातील विविध ठिकाणांवरील एकूण ३५ सीसीटीव्ही कॅमेऱ्यांचे फुटेज तपासून मुर्तीच्या हालचालींचा मागोवा घेणे, घटनास्थळ परिसरातील तसेच संभाव्य मार्गावरील प्रत्यक्षदर्शी व इतर साक्षीदारांकडे सखोल विचारपूस करून त्यांच्याकडून महत्त्वपूर्ण माहिती संकलित करणे, रेल्वे स्टेशन, बसस्थानक व प्रवाशांची वर्दळ असलेल्या ठिकाणी शोध घेणे, तसेच शहर व परिसरातील निर्जनस्थळे, मंदिरे, नदीकाठ व नदी परिसर अशा विविध संभाव्य ठिकाणी प्रत्यक्ष जाऊन तपासणी व शोधमोहीम राबविण्याची जबाबदारी पथकांना देण्यात आली होती. प्रत्येक पथकाने आपापल्या कार्यक्षेत्रात समन्वयाने काम करून उपलब्ध माहितीची पडताळणी केली. संभाव्य ठिकाणांवर जाऊन प्रत्यक्ष शोध घेतला, नागरिकांकडून माहिती मिळविली तसेच संशयित हालचाली व मुलींच्या संभाव्य वास्तव्याच्या ठिकाणांबाबत माहिती संकलित केली. प्राप्त माहितीचे एकत्रित विश्लेषण करून पुढील शोधकार्याची दिशा निश्चित करण्यात आली. अशा प्रकारे शहरातील विविध भागांत एकाच वेळी समांतर शोधमोहीम राबवून पोलिसांनी मुलींचा मागोवा घेण्यासाठी व्यापक प्रयत्न केले.


तांत्रिक विश्लेषणः गोपनीय माहितीच्या आधारे तपासाला दिशा

शोधमोहीम अधिक प्रभावी करण्यासाठी उपलब्ध तांत्रिक माहिती व डिजिटल पुराव्यांचे सखोल विश्लेषण करण्यात आले. तसेच सीसीटीव्ही फुटेजमधून प्राप्त माहितीची पडताळणी करून मुलींच्या संभाव्य ठिकाणाबाबत माहिती मिळविण्याचे प्रयत्न करण्यात आले. गोपनीय बातमीदारांकडून प्राप्त माहिती व उपलब्ध तांत्रिक माहिती यांचा ताळमेळ घालून तपासाची दिशा निश्चित करण्यात आली. सीसीटीव्ही फुटेजचे परीक्षण, तांत्रिक विश्लेषण, प्रत्यक्ष शोधमोहीम आणि गोपनीय माहितीचे संकलन या सर्व बाबींचा समन्वय साधून पोलिसांनी शोधकार्य सुरू ठेवले.


पहाटे ०५ वाजता हिंगणघाट येथील ठावठिकाणा निश्चित

दरम्यान, दिनांक २०/११/२०२६ रोजी पहाटे ०५:०० वा. च्या सुमारास प्राप्त झालेल्या गोपनीय व तांत्रिक माहितीच्या आधारे सदर सहा अल्पवयीन मुली हिंगणघाट, जिल्हा वर्धा येथे असल्याचे निष्पन्न झाले. त्यानुसार पोलीस पथकांनी माहितीची पडताळणी करून मुलींचा ठावठिकाणा निश्चित केला. याबाबतची माहिती मा. उपविभागीय पोलीस अधिकारी, हिंगणघाट श्री. सुशील नाईक यांना देण्यात आली. त्यांनी तातडीने हिंगणघाट पोलीस स्टेशनचे पोलीस निरीक्षक श्री. अनिल राऊत यांच्याशी समन्वय साधून सदर मुलींचा शोध घेण्यासाठी आवश्यक सूचना व निर्देश दिले.


रामनगर व हिंगणघाट पोलिसांचा समन्वयः सहाही मुली सुरक्षित ताब्यात

मिळालेल्या माहितीच्या आधारे पोलीस स्टेशन रामनगर येथून दोन पोलीस पथके तातडीने हिंगणघाटकडे रवाना करण्यात आली. हिंगणघाट पोलिसांनाही याबाबत आगाऊ माहिती देण्यात आली होती. हिंगणघाट पोलिसांच्या मदतीने व महिला पोलीस अंमलदारांच्या सहाय्याने हिंगणघाट रेल्वे स्टेशनपासून काही अंतरावर सदर सहा अल्पवयीन मुलींचा शोध घेण्यात आला. त्यांना सुरक्षितपणे ताब्यात घेऊन पुढील कार्यवाहीसाठी चंद्रपूर येथे आणण्यात आले.


तत्परता, तांत्रिक कौशल्य व समन्वयातून शोधमोहीम यशस्वी

बालसुधारगृहातून सहा अल्पवयीन मुलींनी पलायन केल्याची घटना घडताच रामनगर पोलिसांनी तातडीने शोधमोहीम सुरू केली. शहरातील ३५ सीसीटीव्ही कॅमेऱ्यांचे फुटेज तपासणे, सायबर पोलिसांची मदत घेणे, तांत्रिक पुराव्यांचे विश्लेषण करणे, गोपनीय माहिती संकलित करणे आणि हिंगणघाट पोलिसांशी समन्वय साधणे अशा विविध स्तरांवर नियोजनबद्ध पद्धतीने कार्यवाही करण्यात आली. या सर्व प्रयत्नांच्या माध्यमातून अवघ्या काही तासांत सहाही अल्पवयीन मुलींचा शोध घेऊन त्यांना सुरक्षितपणे ताब्यात घेण्यात रामनगर पोलिसांना यश आले.


सदरची कारवाई करणारे पोलीस अधिकारी व अंमलदार

सदरची संपूर्ण कारवाई पोलीस अधीक्षक आयुष नोपानी, अपर पोलीस अधीक्षक ईश्वर कातकडे व उपविभागीय पोलीस अधिकारी प्रमोद चौगुले यांच्या सूचना व मार्गदर्शनाखाली करण्यात आली. या शोधमोहिमेत पोलीस स्टेशन रामनगरचे पोलीस निरीक्षक प्रभवती एकुरके, सहायक पोलीस निरीक्षक शिवाजी नागवे, हनुमान उगले, शरद भस्मे, रमेश नन्नावरे, अश्विनी वाकडे, बलराम झाडोकर (स्था. गु. शा.), पोलीस उपनिरीक्षक कैलास खोब्रागडे, कृष्णा दराडे, सौरभ साळुखे तसेच पोलीस अंमलदार नितीन पेढाळकर, ललित जांभुळकर, आनंद खरात, प्रकाश बलकी, मंगेश शेंडे, रामप्रसाद नैताम, बाबा नैताम, रविकुमार ढेंगळे, जितेंद्र आकरे, मनीषा मोरे, पंकज ठोंबरे, प्रकाश मडावी, संदीप गेडाम, राजू चिताडे, सूरज शेडमाके, ब्ल्यूटी साखरे व उमेश रोडे (सायबर) यांनी सहभाग घेतला. तसेच हिंगणघाट पोलीस स्टेशनचे पोलीस निरीक्षक अनिल राऊत, पोलीस उपनिरीक्षक प्रवीण नगराळे, पोलीस अंमलदार राजेश शेंडे, अंगेश्वर चौधरी, निलेश नुग्गुरवार, अमोल विगते तसेच महिला पोलीस अंमलदार शामली बनसोड व अपर्णा डांगरे यांनी शोधकार्यात मोलाचे सहकार्य केले.

सीसीटीव्ही फुटेजचे परीक्षण, तांत्रिक तपास, गोपनीय माहितीचे विश्लेषण आणि दोन जिल्ह्यांतील पोलीस यंत्रणेच्या समन्वित प्रयत्नांतून सहाही अल्पवयीन मुलींचा सुरक्षित शोध घेण्यात रामनगर पोलिसांना यश आले.