युवकांनी मानले खासदार बाळू धानोरकरांचे आभार.
Bhairav Diwase. Dec 24, 2020
चंद्रपूर:- कुठल्याही मोठ्या शहरात प्रवेश करताना त्या शहराची ओळख होते. परंतु चंद्रपूर आतापर्यंत याला अपवाद होते. चंद्रपूर शहरात प्रवेश करताना शहराची ओळख करवून देणारे "आय लव्ह चंद्रपूर" मजकुराचा ग्लो साइन बोर्ड लावण्याची मागणी काही दिवसांआधी नमस्ते चांदा फाउंडेशनने केली होती. खासदार बाळू धानोरकर यांनी त्याची तत्काळ दखल घेतली आणि ग्लो साईन बोर्ड लागला.
नमस्ते चांदा फाउंडेशनच्या मागणीनंतर खासदार धानोरकर यांनी पाठपुरावा करून काही दिवसांतच ही मागणी पूर्ण केली. त्यामुळे येथील युवकांमध्ये आनंदाचे वातावरण दिसून येत आहे. कोरोना विषाणूने लॉकडाऊन लागले. यामुळे अनेकांनी घरची वाट धरली. पुणे, मुंबईत मोठ्या पदांवर नोकरीवर असलेले घरी परतले.
त्यातून दुरावलेले मित्र एकत्र आले. त्यांनी एकत्र येत नमस्ते चांदा क्लब स्थापन केला. याच क्लबच्या माध्यमातून दुरावलेल्या या बालमित्रांनी समाज चळवळ सुरू केली. चंद्रपूर शहरात देखील मोठ्या शहर प्रमाणे विकास झाला पाहिजे. ही भावना या युवकांनी मनात बाळगली आहे.
मोठ्या शहरात प्रवेश करताना शहराची ओळख एखाद्या फलकाने किंवा वास्तूने होते. परंतु चंद्रपूर येथे मात्र असल्या कोणत्याच प्रकारची वास्तू दिसून येत नाही. चंद्रपूर हे ऐतिहासिक नगरी आहे. गोंड राजाच्या वारसा ह्या शहराला लाभला आहे. ताडोबा राष्ट्रीय उद्यान, मोठे उद्योग, अनेक महत्वाची ठिकाणे आणि वारसा या शहराला लाभला आहे. त्यामुळे या शहराची ओळख नवीन पिढीला होण्याकरिता नमस्ते चांदा फाउंडेशनने खासदार बाळू धानोरकर यांच्याकडे इतरही मागण्या केल्या आहेत. त्यांपैकी पडोली परिसरात भव्य प्रवेशद्वार लवकरच उभारण्यात येईल, अशी ग्वाही खासदार धानोरकर यांनी युवकांना दिली आहे.