चंद्रपुरात शेकडो जेष्ठ नागरिकांनी घेलता लाभ.
Bhairav Diwase. March 26, 2021
चंद्रपूर:- कोरोना लसीकरणाचा तिसरा टप्पा १ मार्चपासून सुरु झाला असून ज्येष्ठ नागरिकांना लसीकरण केले जात आहे. मात्र लसीकरण करण्यासाठी ऑनलाईन नाव नोंदणी करणे गरजेचे आहे. मात्र काही ज्येष्ठ नागरिकांना ऑनलाईन नोंदणी करणे कठीण जात आहे. त्यामुळे लसीकरणापासून वंचित राहण्याची भिती त्यांना आहे. ज्येष्ठ नागरिकांचा त्रास लक्षात घेता येथील नगरसेवक सुभाष कासनगोट्टवार यांनी मोफत ऑनलाईन नोंदणी केंद्र सुरु केले असून शेकडो ज्येष्ठांना यामुळे दिलासा मिळाला आहे.
१ मार्चपासून लसीकरणाचा तिसरा टप्पा सुरु झाला आहे. यामध्ये ६० ज्येष्ठ नागरिक तसेच ४५ वर्षावरील ज्यांना आजार आहे, अशांना कोरोना लसीकरण केले जात आहे. यासाठी प्रथम नाव नोंदणी करणे गरजेचे आहे. नोंदणी करताना काही ज्येष्ठ नागरिकांना त्रास सहन करावा लागत आहे. अनेकांना ऑनलाईन अर्ज भरणे कठीण जात आहे.
तर काहींनी थेट सायबर कॅफेमध्ये जाऊन अर्ज भरले आहे. यामध्ये त्यांना आर्थिक ताण सहन करावा लागत आहे. ज्येष्ठांची होणारी धावपळ लक्षात घेऊन त्यांना सुविधा व्हावी तसेच लसीकरण करणे सोयीचे व्हावे यासोबतच त्यांना केंद्र तसेच लसीकरणाच्या दिवसाची तत्काळ माहिती करून देण्यासाठी नगरसेवक सुभाष कासनगोट्टवार यांनी मातोश्री शाळेजवळ मोफत ऑनलाईन नाव नोंदणी केंद्र सुरु केले आहे.
या केंद्रामार्फत ज्येष्ठ नागरिकांची माहिती घेऊन आधार क्रमांकानुसार तसेच त्यांच्या सोयीनुसार अर्ज भरून घेतले जात आहे. या केंद्रातून अधिकाधिक ज्येष्ठांची नोंदणी करून घेतली असून संबंधित लसीकरण केंद्रात जावून ते लस टोचून घेत आहे. ऑनलाईन नोंदणी केंद्र सुरु केल्यामुळे ज्येष्ठांना सुलभ झाले असून ही नोंदणी ३१ मार्चपर्यंत केली जाणार असल्याचे नगरसेवक सुभाष कासनगोट्टवार यांनी सांगितले.