मुंबई:- मुंबई नंतर आता संपूर्ण राज्यात दुचाकीवर मागे बसणाऱ्यालाही हेल्मेट सक्ती करणारे परिपत्रक अपर पोलिस महासंचालक (वाहतूक) अरविंद साळवे यांनी काढले आहे.
रस्त्यावर होणारे अपघात टाळण्यासाठी मोटारसायकल चालकांना हेल्मेटसक्ती करण्याचा आदेश राज्य सरकारकडून काढण्यात आला होता. या आदेशाची अंमलबजावणी करण्यासाठी वाहतूक पोलीस आणि स्थानिक पोलिसांनी जोरदार मोहीम राबविली होती. यात हजारो मोटारसायकलस्वारांवर कारवाई करण्यात आली. परिणामी सर्वच महानगरांमध्ये हेल्मेट घालण्याचे प्रमाण वाढले. त्यापाठोपाठ आता मोटारसायकलस्वाराच्या मागे बसणाऱ्या सहप्रवाशांना (पिलीयन रायडर) हेल्मेट सक्तीने घालण्याचे आदेश वाहतूक पोलिसांनी काढले आहेत.
मोटारसायकलस्वार आणि त्याच्या पाठीमागे बसलेल्या व्यक्ती यांनी मोटारसायकल चालवित असताना हेल्मेट वापरणे वाहन कायदा १९८८ कलम १२९ सह १९४ (ड) अन्वये बंधनकारक आहे. विना हेल्मेट मोटारसायकल चालविल्यास मोटार वाहन कायद्यामध्ये ५०० रुपये दंड तसेच ३ महिन्यांसाठी लायसन्स निलंबित करण्याची तरतूद करण्यात आली आहे.
सुधारणा काय?
नियमभंग करणाऱ्यांवर वाहतूक प्रकरणे दाखल होतात. त्याकरीता वापरण्यात येणाऱ्या ई-चालान मशिनमध्ये विना हेल्मेट दुचाकीस्वार व विना हेल्मेट पिलियन रायडर यांच्यावरील कारवाई वाहन कायदा १९८८ कलम १२९ सह १९४ (ड) अन्वये होत असल्याने कारवाईची वेगळी माहिती मिळत नव्हती. आता ई-चालान मशिनमध्ये बदल केले जात आहे. यापुढे विना हेल्मेट दुचाकीस्वार व विना हेल्मेट पिलियन रायडर अशा दोन हेडखाली कडक कारवाई करण्याचे निर्देश दिले आहे.