चंद्रपूर:- गेल्या काही दिवसांपासून सुरू असलेल्या मुसळधार पावसामुळे चंद्रपूर जिल्ह्यातील घोडाझरी तलाव पूर्ण क्षमतेने भरून वाहू लागला आहे. तलावातील पाण्याची पातळी वाढल्याने मोठ्या प्रमाणात पाणी ओव्हरफ्लो मार्गाने बाहेर पडत आहे. यामुळे घोडाझरी गेट मार्गावरून पाणी वाहत असल्यामुळे वाहतुकीसाठी हा मार्ग बंद करण्यात आला आहे. नागरिकांनी पर्यायी मार्गाचा वापर करावा, असे आवाहन वन विभागाकडून करण्यात आले आहे.
मुसळधार पाऊस, घोडाझरी तलाव धोक्याची पातळी ओलांडली
वनपरिक्षेत्र अधिकारी भारती बगमारे यांनी या संदर्भात माहिती देताना सांगितले की, 'सध्या तलावातील पाण्याची पातळी धोक्याची पातळी ओलांडून मोठ्या प्रमाणात विसर्ग सुरू आहे. या मार्गावरून जाणे अत्यंत धोकादायक ठरू शकते. त्यामुळे नागरिकांच्या सुरक्षेच्या दृष्टीने हा मार्ग बंद ठेवण्यात आला आहे. उद्या, २१ ऑगस्ट रोजी परिस्थितीचा आढावा घेऊन हा मार्ग पुन्हा सुरू करण्याबाबत निर्णय घेण्यात येईल.'
नागरिकांना आवाहन
या मार्गावरून ये-जा करणाऱ्या नागरिकांना व परिसरातील ग्रामस्थांना पर्यायी मार्गाचा वापर करण्याचे आवाहन करण्यात आले आहे. घोडाझरी गेट मार्गावरून पाणी वाहत असल्याने जीवितहानीचा धोका निर्माण झाला आहे. त्यामुळे नागरिकांनी सुरक्षिततेची काळजी घेऊन या मार्गाचा वापर टाळावा, असे आवाहन प्रशासनाकडून करण्यात आले आहे.