चंद्रपूर:- चंद्रपूर पोलीस दलातील 137 पोलिस शिपाई पदासाठी एकूण 22 हजार 583 उमेदवारांचे अर्ज आले असून, 19 जूनपासून त्यांची मैदानी चाचणी घेण्यात येणार आहे. चंद्रपूर पोलिसांची मैदानी भरती प्रक्रीया जिल्हा क्रीडा संकुल चंद्रपूर येथे होणार असून दरदिवशी पहाटे पाच वाजतापासून ती भरती प्रक्रीया सुरू होणार असल्याची माहिती पोलीस अधीक्षक मुमक्का सुदर्शन यांनी सोमवारी दिली.
चंद्रपूर जिल्हा पोलिस दलातर्फे बुधवार दिनांक 19 जून सकाळी 5 वाजता पासून जिल्हा क्रीडा संकुल, चंद्रपूर येथे पोलिस भरतीचे आयोजन केले आहे. सदर भरतीमध्ये 137 पोलीस शिपाई व 09 बॅण्डस्मनची रिक्त पदे भरण्यात येणार आहेत. या प्रक्रियेसाठी पोलिस दलाची तयारी पूर्ण झाली असून, पोलीस शिपाई भरतीसाठी एकूण 22 हजार 583 आवेदन अर्ज प्राप्त झाले असून त्यामध्ये पुरुष उमेदवार 13 हजार 443 व महिला उमेदवार 6 हजार 315 तसेच 2 तृतीयपंथी उमेदवारांचे अर्ज प्राप्त झाले आहे. बॅण्डस्मन पदाकरीता पुरुष उमेदवार 2 हजार 176 व महिला उमेदवार 646 तसेच 1 तृतीयपंथी उमेदवारांचे अर्ज प्राप्त झालेले आहे.
19 जूनपासून सुरू होणाऱ्या मैदानी चाचणीसाठी तयारी पूर्ण झाली आहे. 19 जुनला 600 उमेदवारांना बोलविण्यात आले आहे. या सर्व उमेदवारांच्या कागदपत्रांची पडताळणी होणार आहे. कागदपत्र परिपूर्ण असलेल्या उमेदवारांना मैदानी चाचणीला सामोरे जावे लागणार आहे. तत्पूर्वी उंची व छातीचे मोजमाप होणार आहे. मैदानी चाचणीमध्येमहिला उमेदवारांना 1600 मीटर व 100 मीटर धावणे तसेच गोळाफेक राहणार असून या तिन्ही इव्हेंटसाठी उमेदवारांना ५० पैकी गुण दिले जाणार आहे. पुरुष उमेदवारांची शारीरिक मैदानी चाचण्या झाल्यावर महिला उमेदवारांच्या चाचण्यांना सुरुवात होणार आहे. महिला उमेदवारांना 800 मीटर व 100 मीटर धावणे तसेच गोळाफेक राहणार आहे. प्रत्येक इव्हेंटजवळ व्हिडीओग्राफर, छायाचित्रकार सुद्धा नेमले आहेत. भरती प्रक्रियेत मैदानात सर्वत्र सीसीटीव्ही असतील.
तर दुसऱ्या तारखेचा पर्याय
पावसाळा सुरू होत असल्याने पोलीस भरती प्रक्रियेदरम्यान संपूर्ण दिवस पाऊस आल्यास किंवा पावसामुळे त्या दिवशी मैदानी चाचणी घेणे शक्य नसल्यास उमेदवारांना पुढील तारीख देण्यात येईल. काही उमेदवारांना वेगवेगळ्या पदांकरीता एकापेक्षा जास्त ठिकाणी आणि एकच दिवशी मैदानी चाचणीकरीता हजर राहण्याची सुचना प्राप्त झाली असेल, अशा उमेदवारांना दुसरी तारीख दिली जाईल. काही उमेदवारांना इतर अडचणी असल्यास त्याचे निराकरण स्थानिक पातळीवर करण्यात येईल.
पोलीस भरतीमध्ये कोणताही व्यक्ती हा उमेदवारास संपर्क साधून पैशाच्या मोबदल्यात भरतीत निवड निश्चित करण्याचे प्रलोभन दाखवित असल्यास उमेदवाराने प्रलोभनास बळी पडू नये. त्याबाबत लाचलुचपत प्रतिबंधक विभाग, चंद्रपूर किंवा पोलीस अधीक्षकांकडे तक्रार करावी.
मुमक्का सुदर्शन
पोलीस अधीक्षक, चंद्रपूर