मुल:- चंद्रपूर जिल्ह्यातील मुल शहरातून एक बातमी समोर येत आहे, जिथे पोलिसांनी अवैध शस्त्र बाळगणाऱ्या एका युवकासह एका विधी संघर्ष बालकाला अटक केली आहे. त्यांच्याकडून धारदार शस्त्र आणि दुचाकी वाहन असा एकूण ७५,५००/- रुपयांचा मुद्देमाल जप्त करण्यात आला आहे.
मिळालेल्या माहितीनुसार, काल, म्हणजेच २६ जुलै २०२५ रोजी रात्री साडेआठ वाजण्याच्या सुमारास मुल पोलीस स्टेशनचे डीबी पथक आपल्या हद्दीत गस्त घालत होते. गस्तीवर असताना, मुल शहर, चंद्रपूर-मुल रोडवर, व्हीपी बिअर शॉपीसमोर त्यांना संशयास्पदरित्या दोघे जण आढळून आले. यामध्ये शोहेब पठाण (वय २३ वर्षे) आणि एक १७ वर्षीय विधी संघर्ष बालक यांचा समावेश होता. पोलिसांनी त्यांची तपासणी केली असता, त्यांच्या ताब्यातील टीव्हीएस मोपेड वाहनाच्या डिक्कीमध्ये एक धारदार शस्त्र आढळून आले.
पोलिसांनी दिलेल्या माहितीनुसार, या दोघांविरुद्ध कलम ४, २५ आर्म्स ॲक्ट आणि ३(५) बीएनएस अन्वये गुन्हा दाखल करण्यात आला आहे. मुख्य आरोपी शोहेब पठाण याला अटक करण्यात आली असून, विधी संघर्ष बालकालाही ताब्यात घेण्यात आले आहे. या कारवाईत पोलिसांनी एक दुचाकी वाहन आणि अवैध धारदार शस्त्र असा एकूण ७५,५००/- रुपयांचा मुद्देमाल जप्त केला आहे. मुल पोलीस स्टेशनच्या या कामगिरीमुळे अवैध शस्त्र बाळगणाऱ्यांवर वचक निर्माण झाला आहे. पुढील तपास पोलीस करत आहेत.
Social Plugin