स्मार्ट ग्राम बिबीचा 'आदर्श' घोळ.
स्मार्ट ग्राम निधीत २.४२ लाखांची अफरातफर.
भोंगळ कारभार बाबत , सिईओ कडे गावक-यांची तक्रार.
Bhairav Diwase. Aug 26, 2020
कोरपना:- कोरपना तालुक्यातील स्मार्ट ग्राम बिबी सध्या नवनवीन घोटाळ्याने चर्चेत आहे. गावातील रास्त भाव दुकान अनियमिततेमुळे निलंबित झाले, गावात वॉटर एटीएमचा निधी वितरित होऊन प्रत्यक्षात केवळ भूमिपूजन फलक अस्तित्वात असल्याचे माहितीच्या अधिकारात समोर आले होते. आता, पुन्हा एक घोळ माहीतीच्या अधिकारातून समोर आला असून नागरिकांत खमंग चर्चा सुरू झाली आहे.
बिबी ग्रामपंचायतीने आदर्श ग्राम अभ्यास दौरा पाटोदा, शनिशिंगणापूर, शिर्डी, हिवरेबाजार येथे शेकडो शेकडो गावक-यांसह केला. मात्र या दौराचे खोटे व बनावटी बिल सादर करून सरपंच मंगलदास गेडाम व उपसरपंच आशिष देरकर यांनी स्मार्ट ग्राम निधीतील २ लाख ४२ हजार रुपयांची उचल बोगस बिले दाखवून केल्याचे समोर आले आहे. आदर्श दौरानिमीत्त प्रवासासाठी वापरण्यात आलेल्या ५० आसन क्षमतेच्या ट्रॅव्हल्सचा गाडी क्रमांक चक्क चार चाकी फोर व्हिलरचा असल्याने अबब ! चार चाकी गाडीत तब्बल शेकडो प्रवासींचा 'आदर्श घोळ' उघड झाल्याने प्रकरण चांगलेच चर्चेत आले आहे. दरम्यान या प्रकरणाची गंभीर दखल घेऊन तातडीने कारवाई करण्याची मागणी पुराव्यासह गावक-यांनी जिल्हा परिषदेचे मुख्य कार्यपालन अधिकारी राहूल कर्डीले यांचेकडे केली आहे.
बिबी ग्रामपंचायतीच्या बिलात ट्रॅव्हल्सचे जे बस नंबर दाखवले आहे ते प्रत्यक्षात आरटीओकडे चौकशी केल्यानंतर बसचे नसून तिनही गाडी क्रमांक कारचे असल्याचे आरटीओकडे चौकशी केल्यानंतर स्पष्ट झाले. या बिलात MH34BF0024 या 50 सिटर्स बसने प्रवास केल्याचे सादर केले. प्रत्यक्षात आरटीओकडे तपासणी केल्यानंतर सदर गाडी क्रमांक कारचा असल्याचे समोर आले. विशेष म्हणजे ही कार बिबी ग्रामपंचायत उपसरपंच प्रा.आशिष देरकर ज्या शिक्षण संस्थेत काम करतात त्यातील एका पदाधिकऱ्याची असल्याचे समोर आले आहे. तसेच, MH34BF0530 ही मिनी बस व MH34BF8509 हा गाडी क्रमांक बसचा असल्याचे ग्रामपंचायत बिबीने दाखविले. मात्र, सर्व गाडी क्रमांक कारचे असून सदर बिले बोगस असल्याची माहिती पुढे आली. एकंदरीत ४ चाकी तीन कारमध्ये शेकडो नागरिकांनी प्रवास केल्याचे दाखवून शासनाच्या ग्रामविकास विभाग व जिल्हा परिषदेची फसवणूक सरपंच व उपसरपंच यांनी केली असे तक्रारदात्यांनी नमूद केले आहे.
ग्रामविकास विभागाच्या शासन निर्णयानुसार स्मार्ट ग्राम निधी हा अपारंपारिक ऊर्जा संबंधित अभिनव प्रकल्प, भौगोलिक माहिती प्रणाली बसवणे, आंतरराष्ट्रीय मानदंड मार्गदर्शक तत्वे संकलन आणि तपासणी सूची तयार करून दर्जा वाढविण्यासाठी प्रकल्प राबविणे यासाठी खर्च करावयाचा असतो. मात्र आवश्यक कामांवर निधी खर्च करण्याऐवजी मात्र बोगस व शासनाची फसवणूक करणारे बिल सबमिट करून शासनाची व जिल्हा परिषदेची फसवणूक करण्यात आली. हा दखलपात्र गुन्हा असून सखोल चौकशी करुन दोषींविरुद्ध कारवाई करण्याची मागणी माजी सरपंच संतोषकुमार पावडे, चंद्रशेखर चटप, स्वप्निल झुरमुरे, राजेश खनके, सुनिल भोयर, हबीब शेख, संतोष उपरे यांनी केली आहे.
बिबी ग्रामपंचायतीचा वारंवार भोंगळ कारभार उघड होत आहे. सार्वजनिक निधीत अफरातफरीचा व बोगस बिले दाखवून फसवणुकीचा दखलपात्र गुन्हा असल्याचे समोर येत असतांना मुख्य कार्यपालन अधिकारी नेमकी काय कारवाई करतील की राजकीय दबावाला बळी पडून शांततेचे धोरण स्वीकारतील याकडे आता गावकऱ्यांचे लक्ष लागले आहे.