एकतर्फी प्रेमातून तरुणाने कापले तरुणीचे ओठ.
Bhairav Diwase. April 14, 2021
ठाणे:- एकतर्फी प्रेमातून एका तरुणाने साथीदाराच्या मदतीने चाकूने तरुणीचे ओठ कापल्याची घटना उघड झाली आहे. या हल्ल्यात तरुणी जखमी झाल्याने तिला उपचारासाठी मुंबईच्या केईएम रुग्णालयात दाखल करण्यात आले आहे . या हल्ल्याप्रकरणी आरोपी तरुणासह त्याच्या साथीदार मित्रावर शांतीनगर पोलीस ठाण्यात सोमवारी गुन्हा दाखल करण्यात आला आहे. मुक्तार अब्दुल रहीम अंसारी (२३) व शाहीद अशी गुन्हा दाखल झालेल्या तरुणांची नावे आहेत. मुक्तार याचे शांतीनगर पोलीस ठाण्याच्या हद्दीत राहत असलेल्या एका तरुणीवर एकतर्फी प्रेम होते. एक वर्षांपासून मुक्तार हा पीडित तरुणीला त्रास देत होता.
मात्र मुलीचा या प्रेमाला विरोध होता. ही मुलगी आपल्या प्रेमाला विरोध करते म्हणून मुक्तारने मुलीस अनेकदा धमक्याही दिल्या होत्या. नऊ एप्रिलला पीडित तरुणी सकाळी घराबाहेर पडली असता मुक्तार व त्याच्या साथीदाराने तिला गाठले. त्यावेळी मुक्तारच्या साथीदाराने मुलीला जबरदस्तीने पकडून ठेवले व मुक्तारने चाकूने मुलीच्या ओठांवर वार करत ओठ कापले. जखमी अवस्थेत मुलीला उपचारासाठी सुरुवातीला शहरातील इंदिरा गांधी उपजिल्हा रुग्णालयात नेण्यात आले होते, मात्र जखम मोठी असल्याने पुढील उपचारासाठी तिला कळवा रुग्णालयात पाठविण्यात आले. मात्र ओठांवर शस्त्रक्रिया करण्याची आवश्यकता असल्याने डॉक्टरांनी तिला केईएम रुग्णालयात जाण्याचा सल्ला दिला. सध्या तिच्यावर या रुग्णालयात उपचार सुरु आहेत. दरम्यान, याप्रकरणी मुक्तार व शाहीद या दोघांवर शांतीनगर पोलीस ठाण्यात गुन्हा दाखल करण्यात आला आहे.
'तू मेरी नही हुई तो, मैं तुझे किसी और के लायक नही छोडूंगा'.......
'मुक्तारचे पीडित तरुणीवर एकतर्फी प्रेम होते. तू मेरी नही हुई तो, मैं तुझे किसी और के लायक नही छोडूंगा, अशी धमकीही त्याने दिली होती. प्रेमाला विरोध करते म्हणून मुक्तारने अनेकदा धमक्याही दिल्या होत्या, अशी माहिती सुत्रांकडून दिली.
टिप्पणी पोस्ट करा