भारतीय रेल्वेतून रोज कोट्यवधी प्रवायी प्रवास करत असतात. परंतु प्रवास करताना हजारो जणांचे तिकीट कन्फर्म होत नाही. ऑनलाईन केलेले तिकीट प्रतिक्षा यादीत असल्यास रद्द होते. परंतु काऊंटरवर काढलेले तिकीट रद्द होत नाही. यामुळे अनेक जण वेटिंग तिकिटावर रेल्वेतून प्रवास करतात.
या महिन्यापासून कठोर अंमलबजावणी
आता वेटिंग तिकिटावर रेल्वेतून प्रवास करण्यासंदर्भात 1 जुलैपासून मोठे बदल करण्यात आले आहे. वेटिंग तिकिटावर रेल्वे प्रवास केल्यास दंड आकारण्यात येणार आहे. तसेच टीसी रेल्वेतून उतरवूनसुद्धा देणार आहे. रेल्वेचा हा नियम इंग्रजांच्या काळापासून आहे. परंतु त्याची अंमलबजावणी आता कठोरपणे सुरु झाली आहे.
लाखो लोकांवर परिणाम
रेल्वेने आरक्षित डब्यातून वेटिंग तिकिटावर प्रवास करण्यास पूर्णपणे निर्बंध आणले आहेत. म्हणजेच तुमचे वेटिंग तिकीट असल्यास एसी किंवा स्लीपर कोचमधून तुम्ही प्रवास करु शकत नाही. 1 जुलै पासून या निर्णयाची अंमलबजावणी सुरु आहे. जुलै महिन्यापूर्वी वेटिंग तिकिटावर प्रवास करणारे प्रवासी प्रवास करु शकत होते. परंतु नियमाची अंमलबजावणी सुरु झाल्यामुळे त्याचा परिणाम वेटिंगवर प्रवास करणाऱ्या लाखो लोकांवर सुरु झाला आहे.
इंग्रजांच्या काळापासून हा नियम आहे अस्तित्वात
रेल्वेत प्रतिक्षा यादीत असताना प्रवास करण्यास प्रतिबंध करणारा नियम इंग्रजांच्या काळापासून असल्याचे रेल्वेच्या अधिकाऱ्यांनी म्हटले आहे. परंतु या नियमाचे पालन होत नव्हते. आता रेल्वेने या नियमाचे काटेकोरपणे पालन करण्याचे निर्देश दिले आहेत. यामुळे ऑफलाईन तिकीट काढले असले तरी ते रद्द करुन पैसे परत घ्यावे, असे रेल्वेकडून सांगण्यात आले आहे.
किती आकारणार दंड
रेल्वेने आपल्या आदेशात म्हटले आहे की, वेटिंग तिकिटावर आरक्षित डब्यातून प्रवास केल्यास 440 रुपये दंड लागणार आहे. दंड भरुन प्रवाशांची सुटका होणार नाही. त्यांना त्या आरक्षित डब्यातून प्रवास करता येणार नाही. टीसीने दंड वसूल केल्यानंतर वेटिंगवर असणाऱ्या प्रवाशांना त्या डब्यातून किंवा मध्येच अन्य ठिकाणी उतरवून देणार आहे. कुठे उतरवायाचे हा निर्णय सर्वस्वी टिसीचा असणार आहे. त्या प्रवाशांना जनरल कोचमध्ये पाठवण्याचा अधिकारही टीसीकडे असणार आहे. रेल्वेने हा आदेश पाच हजार प्रवाशांच्या आलेल्या तक्रारीनंतर जारी केला आहे.