चंद्रपूर:- चंद्रपूर जिल्ह्यातील मूल पोलिसांनी भरारी पथकाचे अधिकारी असल्याची बतावणी करून खंडणी वसूल करणाऱ्या तीन जणांच्या टोळीला अटक केली आहे. त्यांच्याकडून एकुण १३ लाख १० हजार रुपयांचा मुद्देमाल जप्त करण्यात आला आहे.
मिळालेल्या माहितीनुसार, ३ जुलै २०२५ रोजी आरोपी बादल दुर्गाप्रसाद दुबे (वय ३६), सौ. संगीता बादल दुबे (वय २७) (दोघे रा. रेंगेपार, ता. साकोली, जि. भंडारा), अजय विजय उईके (वय ३१, रा. गजानन मंदिर रोड, शीतला माता मंदिराच्या मागे, चंद्रपूर) देवेंद्र चरणदास सोनवणे वय ३० वर्ष रा. निलज ता. साकोली जि. भंडारा ह. मु. भिवापूर वार्ड चंद्रपूर यांनी संगनमत करून सुरेश लक्ष्मण गणमेनवार (वय ३६, रा. चिरोली) यांच्या घरी एका पांढऱ्या रंगाच्या अर्टिगा कारमधून (क्र. MH34-CJ-5824) जाऊन स्वतःला चंद्रपूर पोलीस भरारी पथकाचे अधिकारी असल्याचे भासवले. त्यांनी गणमेनवार यांच्या घरातून विनापरवाना दारू सापडल्याचा धाक दाखवून १५,००० रुपयांची मागणी केली आणि तडजोडीअंती १०,००० रुपये खंडणी वसूल केली.
त्याच दिवशी, त्यांनी मौजा डोंगरगाव येथील एजाज शेख इब्राहिम शेख यांच्या अंडा-आमलेटच्या दुकानात जाऊन तिथे दारू पिणारे लोक आढळल्याने कारवाईचा धाक दाखवला आणि १०,००० रुपयांची मागणी केली. तडजोडीअंती त्यांनी ५,००० रुपये खंडणी वसूल केली.
सुरेश लक्ष्मण गणमेनवार यांनी १३ जुलै २०२५ रोजी दिलेल्या तक्रारीवरून मूल पोलीस ठाण्यात अपराध क्रमांक २५३/२०२५, कलम ३०८ (२), २०४, ३(५) भारतीय न्याय संहिता-२०२३ अन्वये गुन्हा दाखल करण्यात आला.
पोलिसांची कारवाई:
गुन्ह्याच्या तपासात, मूल पोलिसांनी तात्काळ कारवाई करत वरील नमूद आरोपी बादल दुर्गाप्रसाद दुबे, सौ. संगीता बादल दुबे आणि अजय विजय उईके या तिघांना अटक केली.
आरोपींकडून खालील मुद्देमाल जप्त करण्यात आला:
* एक पांढऱ्या रंगाची अर्टिगा कार (क्र. MH34-CJ-5824) किंमत १२,५०,००० रुपये.
* दोन विवो कंपनीचे आणि एक ओप्पो कंपनीचा मोबाईल, किंमत ४५,००० रुपये.
* रोख १५,००० रुपये.
अशा प्रकारे एकूण १३,१०,००० रुपयांचा मुद्देमाल जप्त करण्यात आला आहे. पुढील तपास मूल पोलीस करत आहेत.
पथकाची कामगिरी:
सदर कारवाई पोलीस अधीक्षक श्री मुम्मका सुदर्शन, अपर पोलीस अधीक्षक श्री ईश्वर कातकडे, प्रभारी उपविभागीय पोलीस अधिकारी श्री सुधाकर यादव यांच्या मार्गदर्शनाखाली पोलीस स्टेशन मूलचे ठाणेदार पो.नि. श्री विजय राठोड यांच्या नेतृत्वात करण्यात आली. या कारवाईत सपोनि श्री सुबोध वंजारी, पोहवा/२४० जमीर खान पठाण, पोहवा/२३९७ भोजराज मुंडरे, नापोअं/२४९७ चिमाजी देवकते, पोअं/१८३ नरेश कोडापे, पोअं/१२३२ शंकर बोरसरे, पोअं/१३० संदीप चौधरी या कर्मचाऱ्यांनी सक्रिय सहभाग घेतला.
नागरिकांना आवाहन:
पोलिसांनी नागरिकांना आवाहन केले आहे की, अशा प्रकारच्या खंडणीबाज तोतया पोलिसांच्या धमकीला बळी पडू नका. जर कोणी अशा प्रकारे खंडणीची मागणी करत असेल, तर तात्काळ जवळच्या पोलीस ठाण्यात किंवा पोलीस नियंत्रण कक्ष चंद्रपूर येथे ११२ वर कॉल करून माहिती द्यावी आणि पोलिसांना सहकार्य करावे.