चंद्रपूर:- ग्रामीण जनतेशी नाळ जुळवणाऱ्या चंद्रपूर जिल्हा मध्यवर्ती सहकारी बँकेच्या निवडणुकीचा निकाल दिनांक ११ जुलै २०२५ रोजी जाहीर झाला. या निवडणुकीत पहिल्यांदाच भाजपने नेतृत्व करत अनेक उमेदवार अविरोध निवडून आणत काँग्रेसच्या एकहाती सत्तेच्या प्रयत्नांवर पाणी फेरलं. आज नागपूर येथील निवासस्थानी माजी आमदार श्री. मितेशजी भांगडिया यांच्या नेतृत्वात भाजप पॅनेलच्या यशस्वी संचालकांचा सन्मान चिमूर विधानसभा मतदारसंघाचे आमदार बंटी भांगडिया यांनी केला आहे.
या विजयानंतर चंद्रपूर जिल्ह्यात सहकार क्षेत्रात भाजपचा ठसा अधिक गडद झाला आहे. यामधे प्रामुख्याने सत्कार मूर्ती तथा नवनियुक्त संचालक म्हणून सर्वश्री संजय डोंगरे, रविंद्र शिंदे, जयंत टेंभुर्डे, आवेश पठाण, गणेश तर्वेकर, नंदाताई अल्लुरवार, गजानन पाथोडे, यशवंत दिघोरे, रोहित बोम्मावार, ललित मोटघरे, निशिकांत बोरकर यांचा समावेश आहे. या प्रसंगी प्रामुख्याने उपस्थित सर्व नवनियुक्त संचालकांनी चंद्रपूर जिल्हा मध्यवर्ती सहकारी बँके भारतीय जनता पार्टीचाच झेंडा फडकणार असा संकल्प घेत मानस व्यक्त केला.
आ. बंटी भांगडिया आणि रविंद्र शिंदे यांची भेट?
रविंद्र शिंदे यांच्याकडे तीन संचालक असल्याने त्यांचे समर्थन मिळाल्यास भाजपचा पहिल्यांदा जिल्हा मध्यवर्ती सहकारी बँकेवर अध्यक्ष बनू शकतो. आमदार बंटी भांगडिया यांनी रवींद्र शिंदे यांना आपल्याकडे ओढण्याचा प्रयत्न केला आणि त्यांनी मुख्यमंत्री देवेंद्र फडणवीस यांचे सोबत चर्चा घडवून आणल्याची गोपनीय सूत्रांनी माहिती दिली.
रविंद्र शिंदे भाजपात प्रवेश करणार असल्याची चर्चा?
विद्यमान उबाठा शिवसेनेचे जिल्हा प्रमुख रविंद्र शिंदे हे भाजप मध्ये प्रवेश करून चंद्रपूर मध्यवर्ती सहकारी बँकेचा अध्यक्ष पदाचे दावेदार असतील अशी माहिती समोर येत आहेत. त्यामुळे चंद्रपूरच्या राजकीय गोटात मोठी खळबळ उडाली आहे.
कोण आहेत रविंद्र शिंदे?
वरोरा भद्रावती विधानसभा क्षेत्रात शिवसेना उबाठा जिल्हा प्रमुख रविंद्र शिंदे यांचा सहकार क्षेत्रात मोठा दबदबा आहें आणि त्यांनी सहकार क्षेत्रात आपली मजबूत पकड करून तत्कालीन खासदार स्वर्गीय बाळू धानोरकर यांना सहकार क्षेत्रात पाय रोवू दिले नाही आणि दोन्ही बाजार समित्या जिंकल्या त्यामुळे रवींद्र शिंदे यांची सहकार क्षेत्रात ताकत बघता त्यांना भाजप मध्ये आणण्यास भाजप आमदार बंटी भांगडिया आतुर होते आता त्यावर शिक्कामोर्तब होईल अशी चर्चा असून शिवसेना उबाठा गटाला जय महाराष्ट्र करून रविंद्र शिंदे लवकरच भाजपमध्ये प्रवेश करणार आहेत. अशी माहिती समोर येत आहे.