पुणे:- पुणे शहर अनेक दशकांपासून "शिक्षणाचे माहेरघर" म्हणून ओळखले जाते. देशभरातून हजारो विद्यार्थी येथे स्पर्धा परीक्षा, पोलीस भरती, यूपीएससी, एमपीएससी आणि बँकिंग परीक्षांसाठी तयारी करण्यासाठी येतात. परंतु सध्या घडणाऱ्या घटनांमुळे पुण्याची ही प्रतिमा धोक्यात आली आहे. याचं कारण म्हणजे सराव करायला आलेल्या विद्यार्थ्यांवर सर्रास हल्ले होणं. ताज्या घटनेत, तळजाई मैदानावर पोलीस भरतीसाठी शारीरिक तयारी करणाऱ्या विद्यार्थ्यांवर १५ ते २० पैलवानांनी हल्ला केला. ही घटना सोमवारी सकाळी सरावादरम्यान घडली. हल्लेखोर हे मामासाहेब मोहोळ तालीम व हनुमान आखाडा यांच्याशी संबंधित असल्याचा आरोप आहे.
विद्यार्थ्यांवर हल्ला कसा झाला?
नेहमीप्रमाणे विद्यार्थी मैदानात शारीरिक सराव करत होते. त्याच वेळी दोन युवकांनी सरावात वारंवार अडथळा आणण्याचा प्रयत्न केला. सुरुवातीला वाद झाला, परंतु विद्यार्थ्यांनी समजूतदारपणा दाखवत तो वाद मिटवण्याचा प्रयत्न केला. मात्र काही वेळात त्या दोघांनी फोन करून १५ ते २० पैलवानांना बोलावले. काहीच वेळात गाड्यांनी आलेल्या या गटाने विद्यार्थ्यांवर अचानक हल्ला चढवला. प्रत्येक विद्यार्थ्यावर ३-४ जणांनी एकत्र हल्ला केला. डोक्यात दगड घालण्याचा प्रयत्न, महिलांना शिवीगाळ व धक्काबुक्की केली, अशी माहिती विद्यार्थ्यांनी दिली आहे. उद्यापासून जर कोणी मैदानावर दिसला तर पाहून घेऊ, अशी उघड धमकी आरोपींनी दिली.
व्हिडिओ समाजमाध्यमांवर व्हायरल?
या संपूर्ण घटनेचा व्हिडिओ सोशल मीडियावर मोठ्या प्रमाणात व्हायरल झाला आहे. व्हिडिओमध्ये स्पष्टपणे मारहाण, शिवीगाळ, आणि धक्काबुक्कीसारख्या घटना कैद झाल्या आहेत.
पोलीसांची हलगर्जीपणा?
राज्यातील विविध भागातून विद्यार्थी येथे पोलीस भरतीच्या तयारीसाठी येत असतात. नेहमीप्रमाणे विद्यार्थी सराव करत होते. त्यावेळी मामासाहेब मोहोळ तालमीतील आणि हनुमान आखाड्यातील १५ ते २० पैलवान आले आणि तेथील प्रत्येक विद्यार्थ्याला त्यांनी मारहाण केली. एका विद्यार्थ्याला चार चार जण मारत होते. तसेच जीवे मारण्याची धमकीही दिली. पोलीसांनी तक्रार घेण्यास उशिर केला. आम्हाला सकाळपासून फक्त इकडून तिकडे फिरवलं जात आहे, अशी माहिती पोलीस भरतीची तयारी करणाऱ्या विद्यार्थ्यांच्या प्रशिक्षकांनी दिली. पोलीस निरीक्षक राहुल गौड (सहकारनगर पोलीस स्टेशन) यांनी सांगितले की, घटनेचा ड्राफ्ट गुन्हा तयार केला असून, लवकरच एफआयआर दाखल केला जाईल.
विद्यार्थी पोहचले पोलिसात?
पुणे फिटनेस क्लब पोलीस अकॅडमीचे हे सगळे विद्यार्थी आहे. मुजीब पठाण हे या अकॅडमीचे संचालक आहेत. दरम्यान गेल्या अनेक दिवसांपासून हे स्थानिक गावगुंड यांचा पाठलाग सुद्धा करत असल्याचं विद्यार्थ्यांनी म्हटले आहे. मारहाण झाल्यानंतर हे सर्व विद्यार्थी सहकारनगर पोलिस ठाण्यात जमले असून पोलिसांकडून गुन्हा दाखल करून घेतला जात नसल्याचा आरोप विद्यार्थ्यांनी केला आहे.