आमदार देवराव भोंगळे यांची जिल्हाधिकाऱ्यांकडे मागणी
चंद्रपूर:- राजस्थानमधील झालावाड जिल्ह्यातील पिपलोडी येथील एका प्राथमिक शाळेचे छत कोसळून चार विद्यार्थ्यांचा मृत्यू झाल्याची अत्यंत दुर्दैवी घटना घडली आहे. टाइम्स ऑफ इंडियाने दिलेल्या वृत्तानुसार, या घटनेत ३० ते ४० विद्यार्थी ढिगाऱ्याखाली अडकले असण्याची भीती व्यक्त होत आहे. या घटनेने देशभरात हळहळ व्यक्त होत आहे.
या गंभीर घटनेची दखल घेत राजुराचे आमदार देवराव भोंगळे यांनी चंद्रपूर जिल्ह्यातील सर्व शासकीय तसेच खाजगी शाळांच्या इमारतींचे तातडीने स्ट्रक्चरल ऑडिट (Structural Audit) करण्याची मागणी केली आहे. त्यांनी या संदर्भात चंद्रपूरच्या जिल्हाधिकाऱ्यांना एक पत्र लिहिले आहे.
आमदार भोंगळे यांनी आपल्या पत्रात म्हटले आहे की, चंद्रपूर जिल्हा आदिवासीबहुल असून राज्याच्या टोकावर वसलेला आहे. त्यामुळे, या जिल्ह्यातील जिल्हा परिषदेच्या तसेच खाजगी मालकीच्या सर्व शाळांच्या इमारतींचे, विशेषतः जीर्ण आणि धोकादायक स्थितीत असलेल्या इमारतींचे तातडीने स्ट्रक्चरल ऑडिट करणे अत्यंत आवश्यक आहे. यामुळे संभाव्य धोके ओळखून विद्यार्थ्यांची सुरक्षितता सुनिश्चित करता येईल, असे त्यांनी नमूद केले आहे. भोंगळे यांनी जिल्हाधिकाऱ्यांनी या गंभीर विषयावर तातडीने लक्ष घालून योग्य ती कार्यवाही करावी, अशी आशा व्यक्त केली आहे.
या संदर्भात, जिल्हाधिकारी कार्यालयाने आमदार देवराव भोंगळे यांनी उपस्थित केलेल्या मुद्याच्या अनुषंगाने तात्काळ नियमानुसार योग्य ती कार्यवाही करण्याचे निर्देश दिले आहेत. तसेच, केलेल्या कार्यवाहीचा अहवाल आमदार महोदयांना आणि जिल्हाधिकारी कार्यालयास सादर करण्याचेही सूचित करण्यात आले आहे. राजस्थानमधील घटनेच्या पार्श्वभूमीवर, चंद्रपूर जिल्ह्यातील शालेय विद्यार्थ्यांच्या सुरक्षिततेसाठी ही एक महत्त्वाची आणि तातडीची मागणी मानली जात आहे.