चंद्रपूर:- गोंडवाना विद्यापीठाच्या १४ व्या वर्धापनदिन सोहळ्यात सरदार पटेल महाविद्यालयाचे राष्ट्रीय सेवा योजना (रासेयो) कार्यक्रम अधिकारी डॉ. कुलदीप राजकिशोर गोंड यांना अत्यंत प्रतिष्ठेच्या 'विद्यापीठस्तरीय उत्कृष्ट राष्ट्रीय सेवा योजना कार्यक्रम अधिकारी' पुरस्काराने सन्मानित करण्यात आले आहे.
डॉ. कुलदीप गोंड यांनी रासेयोच्या माध्यमातून समाजासाठी केलेल्या उल्लेखनीय कार्याची ही अधिकृत पावती आहे. त्यांनी समाजप्रबोधन, विद्यार्थ्यांमध्ये सामाजिक बांधिलकीचे जागरण, पर्यावरण संरक्षण, आरोग्यविषयक जनजागृती आणि विशेषतः ग्रामीण भागात विविध सेवा उपक्रम राबवण्यात अत्यंत मोलाचे आणि प्रभावी योगदान दिले आहे. त्यांच्या सातत्यपूर्ण कार्यामुळे त्यांची या पुरस्कारासाठी निवड करण्यात आली.
हा गौरव सोहळा पद्मश्री डॉ. चंद्रशेखर मेश्राम, गोंडवाना विद्यापीठाचे कुलगुरू डॉ. प्रशांत बोकारे, आणि इतर मान्यवरांच्या उपस्थितीत पार पडला. यावेळी मान्यवरांच्या हस्ते डॉ. कुलदीप राजकिशोर गोंड यांना सन्मानचिन्ह आणि प्रमाणपत्र प्रदान करून त्यांचा यथोचित गौरव करण्यात आला.
पुरस्कारावर प्रतिक्रिया व्यक्त करताना डॉ. गोंड यांनी नम्रपणे सांगितले की, "आज मिळालेला सदर पुरस्कार माझ्या एकट्याच्या कामगिरीची नाही, तर आपण सगळ्यांनी मिळून उभारलेल्या सेवाभावाची पावती आहे. स्वतःला झोकून देणाऱ्या माझ्या प्रत्येक स्वयंसेवकाचे समर्पण याशिवाय ही ओळख पूर्ण झालीच नसती."
या उत्कृष्ट कामगिरीबद्दल सरदार पटेल महाविद्यालयाचे प्राचार्य डॉ.पी.एम. काटकर, सर्व रासेयो कार्यक्रम अधिकारी, प्राध्यापकवृंद, शिक्षक, शिक्षकेत्तर कर्मचारी आणि स्वयंसेवक यांनी डॉ. गोंड यांचे मनःपूर्वक अभिनंदन केले आहे.
दरम्यान सर्वोदय शिक्षण मंडळाचे अध्यक्ष अरविंद पोरेड्डीवार, कार्याध्यक्ष आ. किशोर जोरगेवार, उपाध्यक्ष सुदर्शन निमकर, सगुणाताई तलांडी, सचिव प्रशांत पोटदुखे, सहसचिव डॉ. किर्तीवर्धन दीक्षित, कोषाध्यक्ष संदीप गड्डमवार, सर्वोदय शिक्षण मंडळाचे कार्यकारी सदस्य, राकेश पटेल, सुरेश पोटदुखे, चंद्रशेखर वाडेगावकर, जिनेश पटेल यांनी डॉ. गोंड यांचे अभिनंदन केले आहे.