चंद्रपूर:- चंद्रपूर जिल्ह्यातील रेल्वे प्रवाशांना भेडसावणाऱ्या विविध समस्यांना वाचा फोडण्यासाठी 'चंद्रपूर रेल प्रवाशी संस्थे'ने आज, ४ डिसेंबर रोजी श्रमिक पत्रकार भवन येथे पत्रकार परिषद आयोजित केली होती. यावेळी संस्थेच्या पदाधिकाऱ्यांनी प्रवाशांच्या मागण्यांकडे रेल्वे प्रशासनाचे होत असलेल्या दुर्लक्षावर तीव्र नाराजी व्यक्त केली.
प्रमुख मागण्या काय आहेत?
संस्थेचे अध्यक्ष रमणीक चौहान यांनी पत्रकार परिषदेत बोलताना स्पष्ट केले की, चंद्रपूरहून पुणे आणि मुंबईला जाणाऱ्या गाड्या अजूनही आठवड्यातून फक्त एकादाच धावत आहेत. ही रेल्वे गाडी नियमितपणे प्रति दिवस सुरू करण्यात यावी, ही प्रमुख मागणी आहे.
यासोबतच, कोलकत्ता शहराकडे जाण्यासाठी चंद्रपूरवरून नवीन रेल्वे गाडी सुरू करण्याची मागणीही यावेळी करण्यात आली. प्रवाशांची वाढती संख्या आणि गैरसोय पाहता या मागण्या तातडीने पूर्ण करणे आवश्यक आहे, असे मत संस्थेच्या पदाधिकाऱ्यांनी व्यक्त केले.
प्रशासनावर दुर्लक्ष केल्याचा आरोप:
संस्थेने यापूर्वीही अनेकदा रेल्वे प्रशासनाला आणि संबंधित लोकप्रतिनिधींना निवेदने दिली आहेत. मात्र, या निवेदनांची कोणतीही दखल घेतली गेली नाही. प्रवाशांच्या समस्यांकडे प्रशासनाने पूर्णपणे दुर्लक्ष केल्याचा आरोप यावेळी करण्यात आला. 'प्रवाशांना विविध समस्यांना सतत सामोरे जावे लागत आहे, तरीही प्रशासन गंभीर नाही,' असे यावेळी उपस्थित पदाधिकाऱ्यांनी सांगितले.
आंदोलनाचा थेट इशारा:
या पत्रकार परिषदेला चंद्रपूर रेल प्रवाशी सेवा संस्थेचे अध्यक्ष रमणीक चौहान यांच्यासह दामोधर मंत्री, नरेंद्र सोनी, पुनम तिवारी, अनिश दिक्षित, डॉ. मिलिंद दाभेरे, महावीर मंत्री, रमेश बोथ्रा आणि अशोक रोहरा आदी प्रमुख पदाधिकारी उपस्थित होते.
जर रेल्वे प्रवाशांच्या या प्रमुख समस्या त्वरित निकाली काढल्या नाहीत, तर संस्था कठोर पाऊल उचलणार आहे. मागणी मान्य न झाल्यास ६, ७ आणि ८ डिसेंबर रोजी जिल्हाधिकारी कार्यालय रेल्वे स्टेशन रोडवर मोठे आंदोलन छेडण्यात येईल, असा थेट इशारा संस्थेने पत्रकाच्या माध्यमातून दिला आहे.