शेतकऱ्यांनी वेळेत नोंदणी करण्याचे आवाहन
पोंभुर्णा:- तालुक्यात रब्बी हंगाम २०२५-२६ साठी ई-पीक पाहणी (Digital Crop Survey – DCS) मोबाईल ॲपद्वारे पीक नोंदणी प्रक्रिया दिनांक १० डिसेंबर २०२५ पासून सुरु करण्यात आली आहे, अशी माहिती तहसीलदार, पोंभुर्णा यांनी दिली आहे.
राज्य शासनाच्या AgriStack संकल्पनेअंतर्गत शेतकऱ्यांच्या पिकांची माहिती डिजिटल स्वरूपात संकलित करण्यात येत असून याच आधारे पीक विमा, नैसर्गिक आपत्ती मदत, कर्जविषयक सुविधा व इतर शासकीय योजनांचे लाभ देण्यात येतात. त्यामुळे प्रत्येक शेतकऱ्याने आपल्या शेतातील रब्बी पिकांची नोंदणी वेळेत करणे अत्यंत आवश्यक आहे.
पीक पाहणी कालावधी:
शेतकरी स्तरावरील नोंदणी :
दिनांक १० डिसेंबर २०२५ ते २४ जानेवारी २०२६
सहाय्यक स्तरावरील तपासणी :
दिनांक २५ जानेवारी २०२६ ते १० मार्च २०२६
शेतकरी स्वतःच्या मोबाईलवरून Google Play Store वर उपलब्ध “ई-पीक पाहणी (DCS)” ॲप डाउनलोड करून पिकांची नोंद करू शकतात. तसेच अडचण आल्यास तलाठी, मंडळ अधिकारी, कृषी मित्र व ग्रामस्तरीय कर्मचाऱ्यांची मदत घेता येईल.
पोंभुर्णा तालुक्यात पीक पाहणीचे काम मोहीम स्वरूपात राबविण्यात येत असून यासाठी ग्रामसभा, कॅम्प व प्रत्यक्ष मार्गदर्शनाच्या माध्यमातून व्यापक जनजागृती करण्यात येत आहे. शेतकऱ्यांना अॅप वापराबाबत प्रत्यक्ष मार्गदर्शन केले जात असून कोणताही शेतकरी पीक नोंदणीपासून वंचित राहू नये यासाठी प्रशासन प्रयत्नशील आहे.
ई-पीक पाहणीमध्ये सक्रिय सहभाग घेऊन शेतकऱ्यांना मदत करणारे ग्रामपातळीवरील कार्यकर्ते, कृषी मित्र, स्वयंसेवक व कर्मचारी यांना तहसील कार्यालयामार्फत प्रोत्साहनपर प्रमाणपत्रे देण्यात येणार आहेत.
सर्व शेतकऱ्यांनी वेळेत व अचूक पीक नोंदणी करून शासनाच्या योजनांचा लाभ घेण्याचे आवाहन तहसीलदार, पोंभुर्णा यांनी केले आहे.