चंद्रपूर:- चंद्रपूर भाजपमध्ये गेल्या काही दिवसांपासून धगधगत असलेल्या अंतर्गत वादाचा अखेर जाहीर स्फोट झाला आहे. चंद्रपूर भाजपच्या नव्याने घोषित करण्यात आलेल्या ग्रामीण जिल्हा कार्यकारिणीला प्रदेशाध्यक्ष रवींद्र चव्हाण यांच्या आदेशाने स्थगिती देण्यात आली आहे.
भाजपचे प्रदेश सरचिटणीस आमदार डॉ. संजय कुटे यांच्या स्वाक्षरीने हे स्थगितीचे पत्र २९ जून रोजी जारी करण्यात आले आहे. चंद्रपूर भाजपच्या इतिहासात ग्रामीण कार्यकारिणीला अशा प्रकारे स्थगिती देण्याची ही पहिलीच वेळ असून, यामुळे जिल्ह्याच्या राजकीय वर्तुळात प्रचंड खळबळ माजली आहे.
नेमकं काय आहे हे प्रकरण? तर, भाजपचे चंद्रपूर ग्रामीण जिल्हाध्यक्ष हरीश शर्मा यांनी गेल्या ४ जून २०२६ रोजी जिल्हा ग्रामीण कार्यकारिणी, मोर्चा आणि विविध प्रकोष्ठांच्या पदाधिकाऱ्यांची यादी घोषित केली होती. नवनियुक्त पदाधिकाऱ्यांच्या निवडीचे बॅनरही जिल्हाभर झळकले होते. मात्र, या कार्यकारिणीत काही विशिष्ट नेत्यांनाच झुकते माप देण्यात आल्याचा आरोप झाला. भाजपचे ज्येष्ठ नेते आणि माजी केंद्रीय गृहराज्यमंत्री हंसराज अहिर यांच्यासह जिल्ह्यातील इतर विद्यमान आमदारांना या संपूर्ण प्रक्रियेत पूर्णपणे अंधारात ठेवण्यात आले, असा आक्षेप घेण्यात आला. कोणालाही विश्वासात न घेता ही एकतर्फी घोषणा घाईघाईने करण्यात आल्यामुळे पक्षात तीव्र असंतोष निर्माण झाला होता.
या दुजाभावामुळे संतप्त झालेल्या नाराज नेत्यांच्या शिष्टमंडळाने थेट मुंबई गाठली. त्यांनी प्रदेशाध्यक्ष रवींद्र चव्हाण आणि महाराष्ट्र प्रभारी शिवप्रकाश यांची भेट घेऊन या वादग्रस्त कार्यकारिणीवर तीव्र आक्षेप नोंदवला. या वरिष्ठ पातळीवरील 'फील्डिंग'नंतर थेट कारवाई करण्यात आली आहे. प्रदेश सरचिटणीस डॉ. संजय कुटे यांनी ग्रामीण जिल्हाध्यक्ष हरीश शर्मा यांना पाठवलेल्या अधिकृत पत्रात स्पष्ट म्हटले आहे की, '४ जून २०२६ रोजी घोषित करण्यात आलेल्या भारतीय जनता पार्टी, चंद्रपूर ग्रामीण जिल्हा कार्यकारिणी, मोर्चा व प्रकोष्ठ पदाधिकारी यादीस प्रदेशाध्यक्ष यांच्या सूचनेनुसार पुढील आदेशापर्यंत स्थगिती देण्यात येत आहे.