विभागीय अप्पर आयुक्तांचा आदेश; सात गावातील नागरिकांना दिवाळी भेट.
पोंभूर्णा:- पोंभूर्णा तालुक्यातील देवाडा खुर्द व इतर गावातील बोगस अतिक्रमण धारकांनी गावविकासासाठी राखीव शासकीय पड,गायरान जमिन व मोठ्या जंगलाची शासकीय जागा तत्कालीन उपविभागीय अधिकारी व महसूल अधिकाऱ्यांशी संगनमत करून अनाधिकृतरित्या शासकीय जागा बळकावली होती. मात्र सदर प्रकरणाबाबत सरपंचांनी उच्च न्यायालयात बोगस पट्टेधारकांच्या विरोधात याचीका दाखल केली. उच्च न्यायालयाच्या आदेशानुसार जिल्हाधिकारी यांनी चौकशी करून ३१ पट्टेधारकांचे पट्टे रद्द केले.बोगस पट्टेधारकांनी आपली अतिक्रमीत जागा वाचविण्यासाठी पुनर्निरिक्षण अपिल विभागीय आयुक्तांकडे पुनर्निरिक्षण अपिल दाखल केले.प्रकरणातील अपिलार्थी व गैरअपिलार्थी यांची बाजू ऐकून जिल्हाधिकारीचा आदेश कायम करत अप्पर आयुक्ताने ३० सप्टेंबर २०२१ ला ३१ बोगस पट्टे रद्द केले.ही जागा परत मिळणार असल्याने देवाडा खुर्द व इतर सहा गावांतील नागरिकांना न्यायालयाने दिवाळी भेट दिली आहे.
पोंभूर्णा तालुक्यातील देवाडा खुर्द हे मोठे महसूली गाव आहे.देवाडा खुर्द येथील गावविकासासाठी राखीव शासकीय पड, गायरान जमिन व मोठ्या जंगलाची शासकीय जागा बोगस अतिक्रमण धारकांनी खोटे व बनावट दस्तऐवज तयार करून तत्कालीन गोंडपिपरीचे उपविभागीय अधिकारी चंद्रभान पराते व महसूल अधिकाऱ्यांशी संगनमत करून अनाधिकृतरित्या सन २०१४-१५ मध्ये बोगस पट्टे हस्तगत केले. हि बाब लक्षात येताच देवाडा खुर्द येथील सरपंच विलासराव मोगरकार यांनी बोगस पट्टेधारकांच्या विरोधात उच्च न्यायालयात याचिका दाखल केली.उच्च न्यायालयाने बोगस पट्टेधारकांना नाकारले होते. चंद्रपूर जिल्ह्याधिकाऱ्यांनी सखोल न्यायालयीन चौकशी करून पोंभूर्णा तालुक्यातील ३१ बोगस पट्टेधारकांचे पट्टे रद्द केले. यात एकट्या देवाडा खुर्दचे बारा पट्टे होते.
बोगस पट्टेधारकांनी पट्टे वाचविण्यासाठी विभागीय आयुक्त नागपूर विभाग यांचेकडे पुनर्निरिक्षण अपिल दाखल केले. अप्पर आयुक्तांनी दोघांची बाजू ऐकून कनिष्ठ न्यायासनाचा अभिलेख मागून घेतला. अखेर ११/११/२०१९ चा जिल्हाधिकारी यांचा आदेश कायम करत ग्रामपंचायत देवाडा खुर्द यांच्या बाजूने निकाल देत ३१ बोगस पट्टे रद्द करण्याचा आदेश ३० सप्टेंबर २०२१ ला पारित केला.
-----------------------------------
विभागीय अप्पर आयुक्त यांनी दिलेल्या आदेशाने देवाडा खुर्द सह थेरगाव,घोसरी,चेकहत्तीबोडी, रामपूर दिक्षीत, झुल्लूरवार तुकूम,घनोटी वासियांनी स्वागत केले आहे. गावविकासाची व चराईची व मोठ्या झाडाच्या जंगलाची जागा देवाडा खुर्द ग्रामपंचायतीला परत मिळणार असल्याने हर्षोल्लासाचे वातावरण आहे.
------------------------------
पट्टे रद्द झालेल्यामध्ये मुकुंदा कोहळे,रूमाजी बुरांडे, शामराव कोहळे,हरि नैताम, भाऊराव गेडाम, रविंद्र वाढई,मायाबाई कोहळे, पुरूषोत्तम बुरांडे,मायाबाई शेरकी कालिदास गव्हारे, , संजय बोधलकर,आणि इतर असे ३१ बोगस पट्टेधारकांचा यात समावेश आहे.
------------------------------------
पोंभूर्णा तालुक्यातील ३१ बोगस पट्टेधारकांने खोटे दस्तऐवज सादर करून शासकीय जमिन बळकावली होती व पट्टे मिळविले होते. याविरूद्ध मी सातत्याने पाठपुरावा करीत न्यायालयीन लढा दिला.अखेर सत्याचा विजय झाला.सदर आदेशानुसार महसूल विभागाने भुमी अधिग्रहण करून देवाडा खुर्द ग्रामपंचायत व इतर गावातील ग्रामपंचायतीकडे तात्काळ ताबा द्यावा व बोगस पट्टेधारक व संबंधित दोषी अधिकाऱ्यांवर कारवाई करावी.विलास मोगरकार.सरपंच देवाडा खुर्द.
