गडचिरोली:- गडचिरोली पोलिसांनी एका महत्त्वपूर्ण कारवाईमध्ये नवेगाव येथील निवृत्त महिला अधिकारी कल्पना केशव उंदिरवाडे यांच्या हत्याकांडाचा छडा लावला आहे. या प्रकरणी पोलिसांनी विशाल ईश्वर वाळके (वय अंदाजे ४० वर्षे, रा. एटापल्ली, जि. गडचिरोली, सध्या रा. नवेगाव) या संशयित आरोपीला अटक केली आहे.
काय आहे नेमके प्रकरण?
१३ एप्रिल, २०२५ रोजी दुपारी १२:०० ते २:३० च्या दरम्यान अज्ञात व्यक्तीने कल्पना केशव उंदिरवाडे (वय ६४ वर्षे, रा. कल्पना विहार, सुयोगनगर, नवेगाव) यांच्या घरी घुसून धारदार शस्त्राने त्यांच्या डोक्यावर वार केले. या हल्ल्यात कल्पना उंदिरवाडे यांचा जागीच मृत्यू झाला होता. या घटनेनंतर मृतकांच्या भावाने गडचिरोली पोलीस ठाण्यात अज्ञात आरोपीविरुद्ध तक्रार दाखल केली होती.
पोलिसांसमोर होते मोठे आव्हान
या गुन्ह्यात आरोपीने कोणताही पुरावा सोडला नसल्यामुळे पोलिसांसमोर आरोपीला शोधून काढणे आणि त्याला अटक करणे हे मोठे आव्हान होते.
पोलिसांनी लावला तपास
गुन्ह्याचे गांभीर्य लक्षात घेऊन पोलीस अधीक्षक श्री. नीलोत्पल आणि अपर पोलीस अधीक्षक (अभियान) श्री. यतिश देशमुख यांच्या मार्गदर्शनाखाली उपविभागीय पोलीस अधिकारी गडचिरोली श्री. सुरज जगताप यांच्या नेतृत्वाखाली तीन विशेष तपास पथके तयार करण्यात आली. या पथकांनी कसून तपास करत साक्षीदार आणि इतर पुराव्यांच्या मदतीने संशयित आरोपी विशाल वाळके याला ताब्यात घेतले.
आरोपीने कबूल केला गुन्हा?
पोलिसांनी केलेल्या चौकशीत विशाल वाळके याने गुन्ह्याची कबुली दिली. तपासात असे निष्पन्न झाले की, आरोपी विशाल वाळके हा मृत कल्पना उंदिरवाडे यांच्या घरात भाडेकरू म्हणून राहत होता. कर्जामुळे आणि उसने घेतलेल्या पैशांमुळे चोरी करण्याच्या उद्देशाने तो १३ एप्रिल रोजी त्यांच्या घरात घुसला. त्यावेळी त्याने कल्पना उंदिरवाडे यांच्या डोक्यावर वार करून खून केला आणि त्यांच्या अंगावरील दागिने घेऊन पळ काढला.
तांत्रिक पुरावे ठरले महत्त्वाचे
या गुन्ह्यात कोणताही प्रत्यक्ष पुरावा नसताना, पोलिसांनी केवळ तांत्रिक पुराव्यांच्या आधारे आणि गोपनीय माहितीच्या मदतीने आरोपीला ओळखले आणि त्याला अटक केली.
आरोपीला पोलीस कोठडी
आरोपी विशाल वाळके याला आज न्यायालयात हजर केले असता, न्यायालयाने त्याला १८ एप्रिल ते २२ एप्रिल, २०२५ पर्यंत पोलीस कोठडीत ठेवण्याचे आदेश दिले आहेत. या गुन्ह्याचा पुढील तपास उपविभागीय पोलीस अधिकारी गडचिरोली श्री. सुरज जगताप करत आहेत.
पोलिस दलाचे कौतुक
पोलीस अधीक्षक श्री. नीलोत्पल, अपर पोलीस अधीक्षक (अभियान) श्री. यतिश देशमुख आणि उपविभागीय पोलीस अधिकारी गडचिरोली श्री. सुरज जगताप यांच्या मार्गदर्शनाखाली पोलीस निरीक्षक रेवचंद सिंगनजूडे, पोलीस निरीक्षक अरुण फेगडे, सहाय्यक पोलीस निरीक्षक भगतसिंग दुलत, सहाय्यक पोलीस निरीक्षक राहूल आव्हाड, सहाय्यक पोलीस निरीक्षक विजय चव्हाण, पोलीस उपनिरीक्षक दिपक चव्हाण, महिला पोलीस उपनिरीक्षक विशाखा म्हेत्रे आणि इतर कर्मचाऱ्यांनी या कारवाईत महत्त्वाची भूमिका बजावली. त्यांच्या या उत्कृष्ट कामगिरीबद्दल सर्वत्र कौतुक होत आहे.