गडचिरोली:- गडचिरोली पोलिसांनी आज (२० मे २०२५) सीआरपीएफच्या मदतीने पाच जहाल माओवाद्यांना अटक केली. हे माओवादी अबुझमाडच्या बिनागुंडा परिसरात विध्वंसक कारवाई करण्याच्या तयारीत होते. अटक करण्यात आलेल्यांमध्ये एक डिव्हीसीएम (DVCM) आणि एक एसीएम (ACM) दर्जाचे वरिष्ठ माओवादी, तसेच तीन प्लाटून सदस्य पदावरील माओवादी सामील आहेत.
मोठा शस्त्रसाठा जप्त
या कारवाईत पोलिसांनी एक स्वयंचलित एसएलआर रायफल, एक .303 रायफल, तीन एसएसआर रायफल आणि दोन भरमार, अशी एकूण ७ अग्निशस्त्रे जप्त केली आहेत. महाराष्ट्र शासनाने या पाचही माओवाद्यांवर एकूण ३६ लाख रुपयांचे बक्षीस जाहीर केले होते. गडचिरोली पोलिसांनी टीसीओसी (TCOC) कालावधीमध्ये घातपाताचा मोठा डाव उधळल्याचे म्हटले आहे.
माओवाद्यांचा हल्ला करण्याचा डाव उधळला
उपविभाग भामरागड अंतर्गत उपपोस्टे लाहेरी येथील मौजा बिनागुंडा येथे ५० ते ६० माओवादी पोलीस जवानांवर हल्ला करण्याच्या उद्देशाने एकत्र जमले असल्याची गोपनीय माहिती पोलिसांना मिळाली होती. या माहितीच्या आधारे, पोलीस अधीक्षक श्री. नीलोत्पल यांच्या मार्गदर्शनाखाली सी-६० (विशेष कृती दल) ची ८ पथके आणि ए कंपनी ३७ बटालियन सीआरपीएफचे पथक १८ मे २०२५ रोजी सदर जंगल परिसरात रवाना करण्यात आले. १९ मे २०२५ रोजी सकाळी सी-६० पथकांनी माओवादविरोधी अभियान राबवत असताना बिनागुंडा गावाला घेराव घातला. यावेळी काही हिरवे-काळे गणवेश परिधान केलेले आणि काही साध्या वेशातील हत्यारांसह असलेले संशयित व्यक्ती पोलिसांवर हल्ला करण्याची योजना आखत असल्याचे दिसून आले. गावात सामान्य नागरिक असल्याने पोलिसांनी गोळीबार न करता अत्यंत शिताफीने पाच माओवाद्यांना त्यांच्याकडील हत्यारांसह ताब्यात घेतले. इतर माओवादी मात्र गावाचा आणि जंगल परिसराचा फायदा घेत पळून जाण्यात यशस्वी झाले.
अटक केलेल्या माओवाद्यांची ओळख
ताब्यात घेण्यात आलेल्या माओवाद्यांची कसून चौकशी केल्यानंतर त्यांची नावे उघड झाली. त्यात, उंगी मंगरू होयाम उर्फ सुमली (डीव्हीसीएम, प्लाटून क्रमांक ३२), वय २८, रा. पल्ली, ता. भैरमगड, जि. बिजापूर (छत्तीसगड), पल्लवी केसा मिडीयम उर्फ बंडी (पीपीसीएम, प्लाटून क्रमांक ३२), वय १९, रा. कोंचल, ता. आवापल्ली, जि. बिजापूर (छत्तीसगड) आणि देवे कोसा पोडीयाम उर्फ सबिता (सदस्य, प्लाटून क्रमांक ३२), वय १९, रा. मारोट बाकापंचायत, ता. आवापल्ली, जि. बिजापूर (छत्तीसगड) यांचा समावेश आहे. उर्वरित दोन माओवाद्यांच्या वयाबाबत ठोस पुरावा नसल्याने त्यांना बाल न्याय मंडळासमोर सादर करण्यात येणार आहे.
गडचिरोली पोलिसांची माओवादविरोधी कटिबद्धता
गडचिरोली जिल्हा माओवादग्रस्त जिल्हा म्हणून ओळखला जातो, जिथे माओवादी सरकारी मालमत्तेचे नुकसान करणे, सुरक्षा दलाच्या जवानांवर हल्ला करणे, आणि इतर देशविघातक कृत्ये करत असतात. जानेवारी २०२२ पासून गडचिरोली पोलिसांनी एकूण १०३ माओवाद्यांना अटक करण्यात यश मिळवले आहे. या यशस्वी कारवाईमुळे गडचिरोली पोलिसांनी माओवादी कारवायांविरोधात आपली कटीबद्धता पुन्हा एकदा दाखवून दिली आहे. पोलीस अधीक्षक श्री. नीलोत्पल यांनी जंगल परिसरात माओवादविरोधी अभियान आणखी तीव्र करण्याचे संकेत दिले असून, माओवाद्यांना हिंसक मार्ग सोडून आत्मसमर्पण करून सन्मानाने जीवन जगण्याचे आवाहन केले आहे.