गडचिरोली:- महाराष्ट्र-छत्तीसगड सिमेवर उपविभाग भामरागड अंतर्गत नुकतेच नव्याने स्थापन करण्यात आलेल्या पोलीस स्टेशन कवंडे हद्दीत विध्वंसक कारवाया करुन घातपात घडवून आणण्याच्या उद्देशाने काही माओवादी एकत्र येऊन दबा धरुन बसले आहेत.
माओवाद्यांचा विध्वंसक कट उधळला!
अशा गोपनीय सुत्रांकडून मिळालेल्या विश्वसनीय माहितीवरुन मा. वरिष्ठांच्या मार्गदर्शनाखाली अपर पोलीस अधीक्षक (प्रशासन) श्री. एम. रमेश यांचे नेतृत्वात गडचिरोली पोलीस दलातील चिशेष अभियान पथकाच्या १२ तुकड्या च सिआरपीएफ ११३ बटा. डी कंपनीची ०१ तुकडी तातडीने काल दिनांक २२/०५/२०२५ रोजी दुपारी कवंडे आणि नेलगुंडा येथून इंद्रावती नदीच्या काठावरील परिसरात माओवादविरोधी अभियान राबविणेकामी रवाना करण्यात आली होती.
जवानांनी प्रत्युत्तरादाखल व स्वसंरक्षणासाठी माओवाद्यांच्या दिशेने गोळीबार:
अवघड जंगल परिसर व प्रतिकूल हवामानाचा सामना करत सदर जंगल परिसरात पोहचून आज दिनांक २३/०५/२०२५ रोजी सकाळी ०७:०० वा. च्या सुमारास पोलीस पथकातील जवान सदर जंगल परिसरात घेराबंदी करुन शोध अभियान राबवित असताना जंगलात दबा धरून बसलेल्या माओवाद्यांनी जवानांना जीवे ठार मारण्याच्या व हत्यार लुटण्याच्या उद्देशाने जवानांच्या दिशेने अंदाधुंद गोळीबार सुरु केला. त्यावेळी पोलीसांनी माओवाद्यांना त्यांच्या हातातील शस्त्र खाली ठेवुन शरण येणे बाबत आवाहन केले असता, माओवाद्यांनी शरण न येता पोलीसांवर आणखी जोरदार हल्ला चढवला. त्यावेळी जवानांनी प्रत्युत्तरादाखल व स्वसंरक्षणासाठी माओवाद्यांच्या दिशेने गोळीबार केला. पोलीसांचा वाढता दबाव पाहून माओवाद्यांनी घनदाट जंगलाचा फायदा घेत घटनास्थळावरून पळ काढला,
घटनास्थळावरून ०४ माओवाद्यांचे मृतदेह आढळले:
सुमारे दोन तास चाललेल्या चकमकीनंतर सदर जंगल परिसरात जवानांनी शोध अभियान राबविले असता, घटनास्थळावर ०२ पुरुष व ०२ महिला असे एकुण ०४ माओवाद्यांचे मृतदेह आढळून आले. सदर मृतक माओवाद्यांची ओळख पटली आहे.
मृतक माओवाद्यांची ओळख पटली:
सन्नू मासा पुंगाटी, वय ३५ वर्षे, रा. कवंडे, तह. भामरागड, जि. गडचिरोली, अशोक ऊर्फ सुरेश पोरीया वड्डे, वय ३८ वर्षे, रा. कवंडे, तह. भामरागड, जि. गडचिरोली, विंज्यो ऊर्फ विज्यो होयामी, वय २५ वर्षे, रा. पोडीया, गंगालूर एरीया (छ.ग.), करुणा ऊर्फ ममीता ऊर्फ तुनी पांडू वरसे, वय २१ वर्षे, रा. गोंगवाडा, तह. भामरागड, जि. गडचिरोली अशी मृतकांची नावे आहेत.
चकमकीनंतर मोठ्या प्रमाणात शस्त्रसाठा जप्त:
वरील मृतक माओवाद्यांवर चकमक, जाळपोळ व खुन इ. वेगवेगळे गुन्हे दाखल आहेत. यासोबतच सदर घटनास्थळावरुन एक एस.एल.आर., दोन ३०३ रायफल व एक भरमार असे एकूण ०४ अग्निशस्त्र, वॉकीटॉकी, माओवादी साहित्य व इतर दैनंदिन वापराचे साहित्य हस्तगत करण्यात गडचिरोली पोलीस दलास यश आले आहे.
वरिष्ठांच्या मार्गदर्शनाखाली गडचिरोली पोलिसांचे शौर्य!
सदरचे माओवादविरोधी अभियान अपर पोलीस महासंचालक (विशेष कृती) डॉ. श्री. छेरिंग दोरजे, विशेष पोलीस महानिरीक्षक (नक्षलविरोधी अभियान) नागपूर, श्री. संदिप पाटील, पोलीस उप-महानिरीक्षक गडचिरोली परिक्षेत्र श्री. अंकित गोयल, पोलीस उप-महानिरीक्षक (अभियान) सिआरपीएफ श्री. अजय कुमार शर्मा, पोलीस अधीक्षक, गडचिरोली श्री. नीलोत्पल, कमांडंट ११३ बटा. सिआरपीएफ श्री. जसवीर सिंह यांच्या मार्गदर्शनाखाली अपर पोलीस अधीक्षक (प्रशासन) श्री. एम. रमेश यांच्या नेतृत्वात सी-६० आणि सिआरपीएफ ११३ बटा. डी कंपनीच्या जवानांनी यशस्वीपणे पार पाडले.
गेल्या ४ वर्षात ८७ माओवादी कंठस्नान, ६३ जणांचे आत्मसमर्पण!
सन २०२१ पासून गेल्या चार वर्षात गडचिरोली पोलीसांच्या सातत्यपूर्ण प्रयत्नांमुळे ८७ कट्टर माओवाद्यांना कंठस्नान, १२४ माओवाद्यांना अटक करण्यात आले आहे व ६३ माओवाद्यांनी गडचिरोली पोलीसांसमोर आत्मसमर्पण केले आहे. सदर खडतर अभियानादरम्यान सी-६० व सिआरपीएफच्या जवानांनी दाखविलेल्या या शौर्यपूर्ण कामगिरीचे पोलीस अधीक्षक श्री. नीलोत्पल यांनी कौतुक केले आहे.
माओवाद्यांना आत्मसमर्पण करण्याचे पोलीस अधीक्षक नीलोत्पल यांचे आवाहन
तसेच पोलीस अधीक्षक नीलोत्पल यांनी सदर भागात माओवादविरोधी अभियान आणखी तीव्र करण्याचे संकेत दिले असून पून्हा एकदा सर्व माओवाद्यांना आत्मसमर्पण करुन आपले जीवनमान उंचाविण्याचे आवाहन केले आहे.