चंद्रपूर:- चंद्रपूर शहरात OYO ब्रँड आणि लोगोचा अनधिकृत वापर करून व्यवसाय करणाऱ्या हॉटेल/लॉज चालकांविरुद्ध चंद्रपूर शहर पोलिसांनी मोठी कारवाई केली आहे. विशेष म्हणजे, या कारवाईला भाजपचे ज्येष्ठ नेते आणि राज्याचे माजी मंत्री सुधीर मुनगंटीवार यांनी विधानभवनात केलेल्या मागणीचे बळ मिळाले आहे.
काय म्हणाले होते सुधीर मुनगंटीवार?
महाराष्ट्रात किती OYO हॉटेल्स आहेत आणि त्यात नेमकं काय घडतंय, याची माहिती गृहराज्यमंत्र्यांनी घ्यायला हवी, अशी मागणी करतानाच या हॉटेल्समध्ये खोल्या एकेक तासासाठी भाड्याने मिळत असल्याचा धक्कादायक दावा सुधीर मुनगंटीवार यांनी केला आहे.
“एक OYO नावाची हॉटेल चेन तयार झाली आहे. मी येताना बघितलं की शहराच्या २०-२० किलोमीटर बाहेर एका निर्जन ठिकाणी OYO हॉटेल दिसतं. मनात शंका आली की हे OYO हॉटेल चेन काय आहे. या अतिशय गंभीर बाबीकडे सरकारने लक्ष देण्याची गरज आहे. या OYO हॉटेलसाठी कोणत्याही ग्रामपंचायत, नगरपरिषद किंवा महानगरपालिकेची परवानगी घेतली जात नाही”, असं मुनगंटीवार विधानसभेत आपल्या भाषणादरम्यान म्हणाले.
आ. मुनगंटीवार यांच्या मागणीनंतर अवघ्या काही दिवसांतच, OYO चे नोडल अधिकारी श्री मनोज माणिक पाटील, अहमदाबाद यांनी चंद्रपूर शहर पोलीस स्टेशनमध्ये लेखी तक्रार दिली. या तक्रारीनुसार, OYO Hotel & Homes Pvt. Ltd. ही कंपनी अधिनियम २०१३ अंतर्गत नोंदणीकृत असून, OYO ROOMS हे ट्रेडमार्क व्यापार चिन्ह अधिनियम १९९९ प्रमाणे रजिस्टर झालेली आहे. कंपनीला चंद्रपूर जिल्ह्यातील अनेक हॉटेल/लॉज OYO कंपनीचा ब्रँड आणि लोगो बनावट पद्धतीने वापरून गैरवापर करत असल्याच्या तक्रारी प्राप्त झाल्या होत्या.
या तक्रारींच्या आधारे, १७ जुलै २०२५ रोजी श्री मनोज माणिक पाटील यांनी चंद्रपूर शहराला भेट देऊन गोपनीय माहिती गोळा केली. या चौकशीत असे निष्पन्न झाले की, चंद्रपूर शहरातील एकूण १५ हॉटेल/लॉज नोंदणीकृत मालकांच्या कोणत्याही व्यावसायिक संबंधाशिवाय किंवा संमतीशिवाय खोटे ट्रेडमार्क OYO ब्रँड आणि लोगोचा गैरवापर करत आहेत. ते OYO च्या बौद्धिक संपदा आणि भांडवली गुंतवणुकीचा बेकायदेशीरपणे वापर करत होते. यामध्ये OYO चा लोगो, डिझाईन घटक, कलाकृती आणि दर्शनी भागाचा गैरवापर करून OYO च्या प्रतिष्ठेला मोठे नुकसान पोहोचवले जात होते.
याप्रकरणी पोलिसांनी १५ हॉटेल/लॉज चालकांवर भारतीय न्याय संहिता-२०२३ च्या कलम ३४५(३), ३४७(१) आणि ट्रेड मार्क अधिनियम १९९९ च्या कलम १०३, १०४ अंतर्गत गुन्हा दाखल केला आहे.
तक्रारीत नमूद केलेल्या हॉटेल/लॉजची नावे खालीलप्रमाणे आहेत:
(1) Hotel Royal Inn - Ballarpur Road, Chandrapur
(2) Hotel Dream Stay - Ashtabhuja, Chandrapur
(3) Hotel Friends Stay - Ballarpur Road, Chandrapur
(4) Leo Star Hotel Ashtabhuja ward, Chandrapur
(5) Hotel R R Inn Babupeth, Chandrapur
(6) Hotel Sky Line - Ashtabhuja ward, Chandrapur
(7) Hotel Ashoka Lodging and Boarding - Babupeth, Chandrapur
(8) Hotel I K Residency - Vikas Nagar, Chandrapur
9) Hotel 3 Star Babupeth, Chandrapur
(10) Hotel Celebrity - Babupeth, Chandrapur
(11) Hotel Green Park - Babupeth, Chandrapur
(12) Hotel 7 Day - Mahakali Mandir Road, Chandrapur
(13) Hotel Sunrise - Jatpura Gate, Chandrapur
(14) Rayan Hotel & Celebration - Vichoda, Chandrapur
(15) Hotel Flagship Inn - Near Janta College, Chandrapur
सदर कारवाई पोलीस अधीक्षक श्री मुम्मका सुदर्शन, अपर पोलीस अधीक्षक श्री ईश्वर कातकडे आणि उपविभागीय पोलीस अधिकारी श्री सुधाकर यादव यांच्या मार्गदर्शनाखाली चंद्रपूर शहर पोलीस स्टेशनचे ठाणेदार, पोलीस निरीक्षक श्री निशिकांत रामटेके यांनी केली आहे.
गुन्ह्याच्या तपासात, मध्यरात्रीपर्यंत चंद्रपूर शहर पोलिसांनी ७ ते ८ हॉटेल/लॉजेसवर धाडी टाकून आवश्यक कारवाई केली आहे. पोलीस स्टेशन चंद्रपूर शहर हद्दीबाहेरच्या हॉटेल/लॉजेसची तपासणी आणि कारवाई देखील करण्यात येत असून, या गुन्ह्याचा सखोल तपास सुरू आहे. श्री. मुनगंटीवार यांच्या मागणीनंतर झालेली ही जलद कारवाई प्रशासनाच्या तत्परतेचे द्योतक मानली जात आहे. यामुळे ब्रँडच्या गैरवापराला आळा घालण्यासाठी पोलिसांची ही कारवाई महत्त्वपूर्ण मानली जात आहे.