मुल:- चंद्रपूर जिल्ह्यातील मुल तालुक्यात असलेले सोमनाथ हे एक प्रसिद्ध पर्यटन स्थळ आहे. निसर्गरम्य परिसर आणि ऐतिहासिक महत्त्व यामुळे येथे मोठ्या संख्येने पर्यटक येत असतात. विशेषतः शनिवार आणि रविवार या सुट्टीच्या दिवशी येथे पर्यटकांची प्रचंड गर्दी उसळते. मात्र, या वाढत्या गर्दीच्या तुलनेत पर्यटकांच्या सुरक्षिततेसाठी कोणतीही ठोस उपाययोजना नसल्याने सुरक्षेचा प्रश्न ऐरणीवर आला आहे.
पर्यटकांची वाढती गर्दी, सोयीसुविधांचा अभाव?
सोमनाथ येथे येणाऱ्या पर्यटकांच्या संख्येत सातत्याने वाढ होत आहे. दूरदूरहून पर्यटक या ठिकाणी निसर्गाचा आणि ऐतिहासिक वास्तूंचा अनुभव घेण्यासाठी येतात. पण, ही वाढती गर्दी विचारात घेता येथे मूलभूत सोयीसुविधांचाही अभाव दिसून येतो.
सुरक्षेचा प्रश्न गंभीर?
सर्वात गंभीर बाब म्हणजे, पर्यटकांच्या सुरक्षेसाठी येथे कोणतीही प्रभावी उपाययोजना नाही. धोकादायक ठिकाणी कठडे नाहीत, सूचना फलक नाहीत आणि आपत्कालीन परिस्थितीत मदत करण्यासाठी प्रशिक्षित कर्मचारीही उपलब्ध नाहीत. धोकादायक खडकांवरून फिरताना अनेकदा पर्यटक बेधुंदपणे वागतात, ज्यामुळे अपघाताचा धोका निर्माण होतो.
जिवीतहानी झाल्यास जबाबदार कोण?
पर्यटनासाठी येणारे अनेक जण उत्साहाच्या भरात स्वतःच्या जीवाची पर्वा न करता धोका पत्करताना दिसतात. अशा परिस्थितीत जर एखादी दुर्घटना घडली आणि जीवितहानी झाली, तर त्याची जबाबदारी कोण घेणार, हा प्रश्न आता उपस्थित होत आहे. स्थानिक प्रशासन आणि पर्यटन विभागाचे याकडे लक्ष देण्याची गरज आहे.
नागरिकांची मागणी?
स्थानिक नागरिक आणि पर्यटकांकडून प्रशासनाकडे तातडीने यावर उपाययोजना करण्याची मागणी होत आहे. सोमनाथ येथे कायमस्वरूपी सुरक्षा रक्षक तैनात करावेत, धोकादायक ठिकाणी कठडे आणि सूचना फलक लावावेत, तसेच आपत्कालीन परिस्थितीत मदत पोहोचवण्यासाठी यंत्रणा सज्ज ठेवावी, अशी मागणी जोर धरू लागली आहे. प्रशासनाने याकडे गांभीर्याने लक्ष देऊन पर्यटकांच्या सुरक्षेसाठी तातडीने पावले उचलणे गरजेचे आहे, अन्यथा भविष्यात मोठी दुर्घटना घडण्याची भीती व्यक्त केली जात आहे.