पेट्रोल पंपांवरील गर्दी अफवांमुळे; प्रशासनाचे स्पष्टीकरण
चंद्रपूर:- गेल्या काही तासांपासून जिल्ह्यातील काही पेट्रोल पंपांवर इंधन संपल्याच्या अफवा पसरत आहेत, ज्यामुळे नागरिकांमध्ये घबराट निर्माण झाली आहे. मात्र, यावर आता खुद्द जिल्हा प्रशासनाने अत्यंत महत्त्वाची माहिती दिली आहे.
चंद्रपूर जिल्ह्यातील पेट्रोल पंपांवर सध्या नागरिकांची मोठी गर्दी पाहायला मिळत आहे. पेट्रोल आणि डिझेलचा साठा संपल्याच्या अफवा सोशल मीडियावर वाऱ्यासारख्या पसरल्या आणि त्यानंतर नागरिकांनी पंपांवर धाव घेतली. यामुळे अनेक ठिकाणी वाहतूक कोंडी आणि गोंधळाची परिस्थिती निर्माण झाली आहे.
या वाढत्या गोंधळाची दखल घेत चंद्रपूर जिल्हा प्रशासनाने तातडीने स्पष्टीकरण जारी केले आहे. चंद्रपूर शहर आणि जिल्ह्यात पेट्रोल, डिझेलचा पुरेसा आणि नियमित साठा उपलब्ध आहे. कोणत्याही प्रकारची इंधन टंचाई निर्माण झालेली नाही. इंधन पुरवठा साखळी सुरळीतपणे सुरू असून, प्रशासन त्यावर सतत लक्ष ठेवून आहे.
सोशल मीडियावरील कोणत्याही चुकीच्या संदेशांवर किंवा माहितीवर विश्वास ठेवू नका. नाहक भीतीपोटी इंधनाचा साठा करण्याचा प्रयत्न करू नये. एकाच वेळी जास्त पेट्रोल, डिझेल खरेदी करू नका. पेट्रोल पंपांवर अनावश्यक गर्दी टाळा, ज्यामुळे वाहतूक कोंडी किंवा कायदा-सुव्यवस्थेचा प्रश्न निर्माण होणार नाही. सर्वात महत्त्वाची गोष्ट म्हणजे, इंधनपुरवठा सुरळीत ठेवण्यासाठी प्रशासन आणि संबंधित कंपन्या आवश्यक त्या सर्व उपाययोजना करत आहेत. त्यामुळे नागरिकांनी प्रशासनावर विश्वास ठेवावा.
प्रशासनाने कडक इशाराही दिला आहे की, इंधनाबाबत अफवा पसरविणे किंवा चुकीची माहिती प्रसारित करणे हा कायद्याने दंडनीय अपराध आहे. अशा कृत्यांमध्ये आढळणाऱ्यांवर कठोर कारवाई करण्यात येईल.
नागरिकांनी कोणतीही शंका असल्यास केवळ अधिकृत शासकीय माध्यमांद्वारेच माहिती घ्यावी. शांतता आणि संयम बाळगून प्रशासनास सहकार्य करावे, असे आवाहन चंद्रपूर जिल्हाधिकारी कार्यालयाने केले आहे.