चंद्रपूर:- चंद्रपूर शहरातून रयतवारी येथील रहिवासी दिलीप चंद्रपाल यादव यांच्या मृत्यू प्रकरणात त्यांचे भाऊ आणि डिजिटल पत्रकार अनुप यादव यांनी स्थानिक गुन्हे शाखा (LCB) आणि चंद्रपूर शहर पोलिसांवर अत्यंत गंभीर आरोप केले आहेत. खोट्या गुन्ह्यात अडकवण्याची धमकी, सातत्याने होणारा मानसिक छळ आणि खंडणीच्या दबावाला कंटाळूनच दिलीप यादव यांनी पोलीस ठाण्यात विष प्राशन करून आत्महत्या केल्याचा दावा अनुप यादव यांनी केला आहे.
काय घडलं १५ ते १७ जुलै दरम्यान?
अनुप यादव यांनी दिलेल्या माहितीवरून, १५ जुलैपासून दिलीप यादव यांना गांजा विक्रीच्या खोट्या प्रकरणात अडकवण्याचे प्रयत्न सुरू होते. शहर पोलीस ठाण्यातील पोलीस कर्मचारी रुपेश पराते आणि भावना रामटेके यांच्याकडून दिलीप यांना वारंवार फोन करून धमक्या दिल्या जात होत्या.
१७ जुलै रोजी दिलीप यांना पोलीस ठाण्यात बोलावण्यात आले. त्यावेळी त्यांनी भावाला फोन करून सांगितले होते की, "मी काहीही चुकीचे केलेले नाही, तरीही पोलीस पैशांसाठी मला गांजा प्रकरणात फसवण्याचा प्रयत्न करत आहेत." या संभाषणाची ऑडिओ रेकॉर्डिंग अनुप यादव यांच्याकडे सुरक्षित आहे.
१७ जुलै रोजी शहर पोलीस ठाण्यातील घटनाक्रम:
कीटकनाशकाची खरेदी: पोलीस ठाण्यात जाण्यापूर्वी दिलीप यादव यांनी गांधी चौकातील एका कृषी केंद्रातून १०० मिली कीटकनाशक विकत घेतले.
पोलीस ठाण्यातील वाद: दिलीप यादव यांचा मुलगा कृष्णा याने अनुप यादव यांना फोनवर माहिती दिली की, पप्पा आणि रुपेश पराते यांच्यात वाद सुरू आहे.
विष प्राशन व बॉटल लपवण्याचा प्रयत्न: याच वादातून दिलीप यादव यांनी सोबत आणलेल्या कीटकनाशकातील ७५% विष प्राशन केले. ही माहिती महिला पोलीस कर्मचारी भावना रामटेके यांनी अनुप यादव यांना फोनवर दिली.
संशयास्पद हालचाली: दिलीप यादव यांनी आत जाऊन विष प्यायले असताना, पोलिसांनी मात्र ते बाहेरूनच विष पिऊन आल्याचा बनाव रचल्याचा आरोप आहे. रुपेश पराते यांनी ती विषाची बॉटल लपवण्याचा प्रयत्न केला, परंतु नंतर तीच बॉटल जिल्हा सामान्य रुग्णालयातील डॉक्टरांच्या टेबलवर दिसून आली.
सीआयडी तपास आणि संशयास्पद मुद्दे:
सीसीटीव्ही (CCTV) फुटेज जप्त: सीआयडीने शहर पोलीस ठाण्याची हार्ड डिस्क जप्त केली असून, त्यादिवशी घडलेल्या संशयास्पद हालचाली सीसीटीव्हीमध्ये कैद झाल्याचा दावा केला जात आहे.
दागिन्यांचा पत्ता नाही: कृषी केंद्र चालकाच्या माहितीनुसार, कीटकनाशक खरेदी करताना दिलीप यादव यांच्या गळ्यात सोन्याची साखळी (चेन) होती, परंतु मृत्यूनंतर ती चेन गहाळ झाल्याचे समोर आले आहे.
मृत्यूपूर्वीचा व्हिडिओ: दिलीप यादव यांनी मृत्यूपूर्वी दोन व्हिडिओ रेकॉर्ड करून सोशल मीडियावर प्रसारित केले होते. यात त्यांनी, "मला पोलीस खोट्या गुन्ह्यात अडकवत असून मला काही झाल्यास संबंधित पोलीस अधिकारी व कर्मचारी जबाबदार असतील," असे स्पष्टपणे म्हटले होते.
हप्ता वसुली आणि खोट्या गुन्ह्यांची पार्श्वभूमी:
कोरोना काळात दिलीप यादव हे दारूचा छोटा व्यवसाय करत असत. मात्र, एलसीबी (LCB) व शहर पोलिसांना ते हप्ता देत नसल्यामुळे एलसीबीचे हिरालाल गुप्ता, किशोर वाकाटे, शहर पोलीस ठाण्याचे रुपेश पराते, भावना रामटेके आणि डीबी इंचार्ज सोनवणे यांची टोळी त्यांना त्रास देत होती. यापूर्वीही दोन वेळा दिलीप यादव यांना गांजा केस प्रकरणात सह-आरोपी म्हणून खोट्या गुन्ह्यात अडकवण्यात आले होते, असा दावा अनुप यादव यांनी पत्रकार परिषदेत केला आहे.
अनुप यादव यांनी सीआयडीकडे खालील प्रमुख मागण्या केल्या आहेत:
कडक कारवाई: भावाचा छळ करणाऱ्या आणि मृत्यूपूर्वीच्या व्हिडिओमध्ये नावे असलेल्या सर्व दोषी पोलीस अधिकारी व कर्मचाऱ्यांवर तात्काळ गुन्हे दाखल करून त्यांना निलंबित करण्यात यावे.
कॉल रेकॉर्डची तपासणी: मागील एका वर्षात दिलीप यादव यांना कोणत्या पोलीस अधिकाऱ्यांनी फोन केले, या सर्व कॉल डिटेल्सची सखोल चौकशी करण्यात यावी.
पोलीस प्रशासनाविरोधात एका पत्रकारानेच थेट पुराव्यांसह सीआयडीकडे तक्रार नोंदवल्यामुळे चंद्रपूर पोलीस दलात प्रचंड खळबळ उडाली आहे. आता सीआयडी या प्रकरणाची चौकशी करून दोषी पोलिसांवर काय कारवाई करते, याकडे संपूर्ण जिल्ह्याचे लक्ष लागले आहे.