पोंभूर्णा:- शिक्षक दिनाचे औचित्य साधून पोंभूर्णा नगरपंचायतीच्या शिक्षण, क्रीडा व सांस्कृतिक समितीच्या वतीने शहरातील दहावी, बारावी तसेच पदवी परीक्षेत उल्लेखनीय यश संपादन करणाऱ्या गुणवंत विद्यार्थ्यांचा सत्कार समारंभ उत्साहात पार पडला. विद्यार्थ्यांच्या शैक्षणिक यशाचा गौरव करताना त्यांना शाल, श्रीफळ, पुष्पगुच्छ, भारतीय संविधानाचा ग्रंथ व सन्मानचिन्ह प्रदान करण्यात आले. कार्यक्रमाचे उद्घाटन नगरपंचायत पोंभूर्णाच्या नगराध्यक्षा सुलभा पिपरे यांच्या हस्ते करण्यात आले. कार्यक्रमाच्या अध्यक्षस्थानी शिक्षण, क्रीडा व सांस्कृतिक समितीचे सभापती लक्ष्मण कोडापे होते.
यावेळी नगराध्यक्षा सुलभा पिपरे यांनी विद्यार्थ्यांचे अभिनंदन करताना सांगितले की, “विद्यार्थ्यांनी मिळविलेले यश ही केवळ त्यांच्या कुटुंबाची नव्हे, तर संपूर्ण पोंभूर्णा शहराची अभिमानाची बाब आहे. शिक्षणाच्या माध्यमातून सक्षम आणि सुसंस्कृत पिढी घडविणे ही काळाची गरज आहे. नगरपंचायतीच्या वतीने गुणवंत विद्यार्थ्यांना प्रोत्साहन देण्यासाठी अशा उपक्रमांना भविष्यातही सातत्याने प्राधान्य दिले जाईल.
अध्यक्षस्थानावरून बोलताना शिक्षण, क्रीडा व सांस्कृतिक समितीचे सभापती लक्ष्मण कोडापे म्हणाले, “यश हा अंतिम टप्पा नसून पुढील वाटचालीची सुरुवात आहे. विद्यार्थ्यांनी स्पर्धेच्या युगात ज्ञान, कौशल्य आणि संविधानिक मूल्ये आत्मसात करून आपले व्यक्तिमत्त्व घडवावे. आजचा सत्कार विद्यार्थ्यांना अधिक मोठी स्वप्ने पाहण्याची प्रेरणा देणारा ठरेल.”
मुख्याधिकारी निखिल लांडगे यांनी विद्यार्थ्यांना मार्गदर्शन करताना सांगितले की, “शिक्षणामुळे व्यक्तीच्या जीवनात परिवर्तन घडते आणि त्यातूनच समाज व देशाची प्रगती होते. विद्यार्थ्यांनी केवळ परीक्षेतील गुणांपुरते मर्यादित न राहता सामाजिक जाणीव, शिस्त आणि जबाबदारीही जोपासावी. भारतीय संविधानाचा ग्रंथ भेट देण्यामागे विद्यार्थ्यांमध्ये संविधानिक मूल्यांची जाणीव निर्माण करण्याचा महत्त्वपूर्ण उद्देश आहे.
विरोधी पक्षनेते आशिष कावटवार यांनी विद्यार्थ्यांच्या यशाचे कौतुक करताना सांगितले की, गुणवंत विद्यार्थ्यांचा गौरव हा केवळ सत्काराचा कार्यक्रम नसून त्यांच्या मेहनतीला समाजाकडून मिळालेली प्रेरणादायी दाद आहे. आजच्या विद्यार्थ्यांनी तंत्रज्ञानासोबतच सामाजिक आणि राष्ट्रीय जबाबदारीची जाणीव ठेवून पुढे जावे. विद्यार्थ्यांच्या शैक्षणिक प्रगतीसाठी सर्वांनी राजकीय मतभेद बाजूला ठेवून एकत्रित प्रयत्न करणे आवश्यक आहे.
नगरसेवक गणेश वासलवार यांनीही विद्यार्थ्यांना शुभेच्छा देताना म्हटले की, यशामागे विद्यार्थ्यांची मेहनत, पालकांचे कष्ट आणि शिक्षकांचे मार्गदर्शन असते. त्यामुळे विद्यार्थ्यांनी आपल्या यशाचे श्रेय देतानाच समाजासाठी काहीतरी करण्याची भावना जपावी. आजचा गौरव हा पुढील यशासाठी प्रेरणादायी ठरो, अशी अपेक्षा आहे.
रुपाली चांदेकर यांनी गुणवंत विद्यार्थ्यांना मार्गदर्शन करताना सांगितले की, “विद्यार्थ्यांनी यशाने हुरळून न जाता सातत्याने ज्ञानार्जन करीत आपल्या ध्येयाकडे वाटचाल करावी. प्रत्येक यशामागे कठोर परिश्रम, चिकाटी आणि सकारात्मक विचारांची मोठी ताकद असते. शिक्षण हे केवळ नोकरी मिळविण्याचे साधन नसून व्यक्तिमत्त्व विकासाचे प्रभावी माध्यम आहे. त्यामुळे विद्यार्थ्यांनी अभ्यासासोबतच संस्कार, सामाजिक जाणीव आणि संविधानिक मूल्ये आत्मसात करून जबाबदार नागरिक बनावे,” असे त्या म्हणाल्या.
यावेळी प्रमुख अतिथी म्हणून मुख्याधिकारी निखिल लांडगे, विरोधी पक्षनेते आशिष कावटवार, महिला व बालकल्याण उपसभापती उषा गोरंतवार, नगरसेविका तथा शिक्षिका रोहिणी ढोले, नगरसेविका शारदा गुरुनुले, रीना उराडे, श्वेता वनकर, नगरसेवक अभिषेक बद्दलवार, महेश रणदिवे, गणेश वासलवार तसेच रुपाली चांदेकर उपस्थित होते.
शिक्षक दिनाचे औचित्य साधून नगरसेविका तथा शिक्षिका रोहिणी ढोले यांचाही त्यांच्या शैक्षणिक व सामाजिक योगदानाबद्दल मान्यवरांच्या हस्ते सत्कार करण्यात आला.
कार्यक्रमाचे संचालन लिपिक रोशन येमूलवार यांनी केले, तर आभार लिपिक वासुदेव मडावी यांनी मानले. कार्यक्रमाला विद्यार्थी, शिक्षक, पालक तसेच नगरपंचायतीचे कर्मचारी मोठ्या संख्येने उपस्थित होते.